पूर्वाधार वाच 
पूर्वाधार वाच, काठमाडौं।
सिद्धि हाइड्रोपावर कम्पनी लिमिटेडले मंगलबार काठमाडौंको नक्सालस्थित लिसारा रिसेप्सनमा आफ्नो तेस्रो वार्षिक साधारणसभा (AGM) सफलतापूर्वक सम्पन्न गरेको छ। कम्पनीका अध्यक्ष अंगिस घिमिरेको अध्यक्षतामा सम्पन्न सभाले सर्वसाधारणका लागि प्राथमिक शेयर (आईपीओ) निष्कासनलगायतका महत्वपूर्ण प्रस्तावहरू सर्वसम्मत रूपमा पारित गरेको छ।
आईपीओ निष्कासनको बाटो खुला
सभाले आयोजना प्रभावित स्थानीय बासिन्दा तथा सर्वसाधारणका लागि आईपीओ जारी गर्ने विशेष प्रस्ताव स्वीकृत गरेको छ। आईपीओ निष्कासन प्रक्रियाका लागि कम्पनीले यसअघि नै सिटिजन्स क्यापिटल लिमिटेडलाई बिक्री प्रबन्धक नियुक्त गरिसकेको जानकारी दिइयो। आवश्यक नियामक स्वीकृति प्राप्त भएपछि आईपीओ सार्वजनिक गरिने कम्पनीले जनाएको छ।
नयाँ आयोजनामा लगानी गर्न सञ्चालक समितिलाई अख्तियारी
कम्पनीले आफ्नो शेयर पूँजी प्रयोग गरी अन्य सम्भाव्य जलविद्युत् आयोजनामा लगानी गर्ने वा ऊर्जा क्षेत्रमा क्रियाशील अन्य कम्पनीको शेयर खरिद गर्ने सम्बन्धमा सञ्चालक समितिलाई पूर्ण अख्तियारी प्रदान गरेको छ। यस निर्णयले कम्पनीको दीर्घकालीन विस्तार रणनीतिलाई थप मजबुत बनाउने अपेक्षा गरिएको छ।
वित्तीय प्रतिवेदन पारित
साधारणसभाले आर्थिक वर्ष २०८१/०८२ को वार्षिक प्रतिवेदन, नाफा–नोक्सान हिसाब, नगद प्रवाह विवरण तथा लेखापरीक्षकको प्रतिवेदनमाथि छलफल गरी अनुमोदन गरेको छ। कम्पनीको वित्तीय अवस्था क्रमशः सुदृढ बन्दै गएको सभामा जानकारी गराइएको थियो।
सिद्धि खोला जलविद्युत् आयोजनाको प्रगति
इलाम जिल्लाको सूर्योदय नगरपालिका र रोङ गाउँपालिकामा अवस्थित १० मेगावाट क्षमताको सिद्धि खोला जलविद्युत् आयोजनाको निर्माण कार्य अन्तिम चरणमा पुगेको कम्पनीले जनाएको छ। आयोजनाको कुल संशोधित लागत २ अर्ब ९ करोड रुपैयाँ पुगेको छ, जसको वित्तीय व्यवस्थापन सिटिजन्स बैंक इन्टरनेशनलको नेतृत्वमा गरिएको हो।
बाढीका कारण ढिलाइ, अब उत्पादनको तयारी
कम्पनीले २०८२ साल असोजको सुरुवातमै व्यापारिक उत्पादन (COD) सुरु गर्ने लक्ष्य राखेको भए पनि सोही महिनामा आएको विनाशकारी बाढीले पाइपलाइनमा क्षति पुर्याएपछि आयोजनामा केही ढिलाइ भएको थियो। हाल मर्मत, परीक्षण तथा प्राविधिक तयारीका कार्यहरू सम्पन्न भई छिट्टै विद्युत् उत्पादन सुरु गर्ने तयारी भइरहेको जानकारी दिइयो।
राष्ट्रिय ग्रिडमा विद्युत् जोडिने
सिद्धि खोला आयोजनाबाट उत्पादन हुने विद्युत् नेपाल विद्युत् प्राधिकरणको लसुने सबस्टेशनमार्फत राष्ट्रिय प्रसारण लाइनमा जोडिनेछ, जसले राष्ट्रिय ऊर्जा आपूर्तिमा योगदान पुर्याउने अपेक्षा गरिएको छ।
अन्य आयोजनामा पनि लगानी विस्तार
सिद्धि हाइड्रोपावरले रुकुम पूर्वमा निर्माणाधीन ४४.५२ मेगावाट क्षमताको सानो भेरी जलविद्युत् आयोजनामा समेत मुख्य लगानीकर्ताको रूपमा २४ करोड ४७ लाख रुपैयाँ लगानी गरिसकेको छ। यस लगानीले कम्पनीको भविष्यको आम्दानी आधार थप सुदृढ बनाउने विश्वास व्यक्त गरिएको छ।
तेस्रो वार्षिक साधारणसभाबाट पारित निर्णयहरूले सिद्धि हाइड्रोपावर कम्पनी लिमिटेडलाई उत्पादन, लगानी विस्तार र पूँजी बजारमा प्रवेशको दृष्टिले नयाँ चरणमा लैजाने अपेक्षा गरिएको छ।
खबर पढेर तपाईलाई कस्तो महसुस भयो ?
मन पर्यो (१००%)
मन परेन (०%)
तटस्थ (०%)
रिस उठ्यो(०%)
प्रतिक्रिया दिनुहोस्