पूर्वाधार वाच, काठमाडौं।

संखुवासभामा अवस्थित १४.९ मेगावाट क्षमताको माया खोला हाइड्रोपावर कम्पनी लिमिटेडले आफ्नो ९औँ वार्षिक साधारण सभा (AGM) काठमाडौंको धुम्बाराहीमा सफलतापूर्वक सम्पन्न गरेको छ। साधारणसभाले कम्पनीको वित्तीय संरचना सुदृढ बनाउन र दीर्घकालीन स्थायित्व सुनिश्चित गर्न १:१ को अनुपातमा हकप्रद शेयर जारी गर्ने महत्वपूर्ण निर्णय गरेको छ।

ऋण घटाएर वित्तीय अवस्था सुधार्ने लक्ष्य

सभामा प्रस्तुत विवरणअनुसार हकप्रद शेयर निष्कासनबाट संकलित रकम मुख्यतया बैंक तथा वित्तीय संस्थाबाट लिएको ऋण चुक्ता गर्न प्रयोग गरिनेछ। ऋण भार घटेसँगै ब्याज खर्चमा उल्लेखनीय कमी आउने र यसले भविष्यमा कम्पनीको नाफा तथा लाभांश वितरण क्षमतामा सकारात्मक प्रभाव पार्ने अपेक्षा गरिएको छ।

प्राविधिक समस्या समाधान, पूर्ण क्षमतामा उत्पादन

कम्पनीका अध्यक्ष दिनेश प्रसाद श्रेष्ठले विगतमा जेनेरेटरका प्रमुख पार्टपूर्जा (Rotor Field Poles) मा देखिएका प्राविधिक समस्याहरू पूर्ण रूपमा समाधान भइसकेको जानकारी दिनुभयो। उहाँका अनुसार आयोजना हाल पूर्ण क्षमतामा विद्युत उत्पादन गरिरहेको छ, जसले आम्दानी स्थिरतामा योगदान पुर्‍याउनेछ।

मर्मत खर्च आपूर्तिकर्ताले व्यहोर्ने, ठेकेदारबाट क्षतिपूर्ति

सभामा जानकारी दिइएअनुसार मर्मतसम्भारका लागि लागेका सम्पूर्ण खर्च उपकरण आपूर्तिकर्ता कम्पनी ‘WEG India’ ले व्यहोरेको छ। साथै, उत्पादन अवरोधका कारण ठेकेदार कम्पनी महावीर श्री इन्टरनेशनलबाट ३ करोड ७५ लाख रुपैयाँ जफत गर्ने प्रक्रिया पनि अघि बढाइएको छ।

साधारणसभाबाट पारित अन्य प्रस्ताव

सभाले हकप्रद शेयर जारी गर्न कम्पनीको अधिकृत तथा जारी पूँजी वृद्धि गर्ने प्रस्ताव स्वीकृत गरेको छ। यसका साथै आर्थिक वर्ष २०८१/८२ को लेखापरीक्षण प्रतिवेदन, नाफा–नोक्सान हिसाब, नगद प्रवाह विवरण तथा सञ्चालक समितिको वार्षिक प्रतिवेदन सर्वसम्मत रूपमा पारित गरिएको छ। आगामी आर्थिक वर्ष २०८२/८३ का लागि नयाँ लेखापरीक्षकको नियुक्ति तथा पारिश्रमिक निर्धारणसम्बन्धी प्रस्ताव पनि स्वीकृत भएका छन्।

हकप्रद शेयरका लागि योग्य शेयरधनी

कम्पनीका अनुसार नेपाल स्टक एक्सचेन्ज (नेप्से) मा २०८२ पुस १६ गतेसम्म कायम रहेका शेयरधनीहरू मात्र प्रस्तावित शतप्रतिशत हकप्रद शेयर भर्न योग्य हुनेछन्।

प्रतिक्रिया दिनुहोस्