पूर्वाधार वाच, काठमाडौं।
शहरी विकास मन्त्रालयका सचिव मणिराम गेलाल केही समयमा अनिवार्य अवकाशमा जाँदैछन् । राष्ट्रिय किताबखाना (निजामती)का अनुसार इन्जिनियरिङ सेवा समूहका सचिव गेलाल आगामी मंसिर १३ गते अनिवार्य अवकाशमा जाने भएका हुन् । ५८ वर्षे उमेर हदका कारण गेलाल अवकाशमा जानेछन् ।
५८ वर्ष पुरा भएका सचिव अनिवार्य अवकाशमा जाने व्यवस्था छ भने सचिव भएर ५८ वर्ष पुग्नुअघि नै ५ वर्ष सचिवका रूपमा सेवा अवधि पुरा गरेकाहरूले पनि अनिवार्य अवकाश पाउने व्यवस्था छ ।
भक्तपुरको चाँगुनारायण नगरपालिका ३, झौखेल निवासी गेलाल यसअघि ऊर्जा, जलश्रोत तथा सिंचाई मन्त्रालय र खानेपानी मन्त्रालयमा समेत सचिवको जिम्मेवारी सम्हालिसकेका छन् ।
सहसचिव हुँदा शहरी विकास तथा भवन निर्माण विभागमा महानिर्देशक रहिसकेका उनी शहरी विकासको जानकार समेत मानिन्छन् । सचिव गेलाल बिल्डिङ एण्ड आर्किटेक्ट इन्जिनियर हुन् ।
चालु आर्थिक वर्ष २०८१/८२ मा नेपाल सरकारका कायममुकायम (कामु) मुख्यसचिवसहित अन्य १७ सचिवहरूले अवकाश पाउने भएका छन् ।
किताबखानाका अनुसार चालु आर्थिक वर्षमा २ हजार ११९ जना नेपाल सरकारका कर्मचारीले अवकाश पाउँदैछन् । त्यसमध्ये हाल कार्यरत १८ जना विशिष्ट श्रेणी (सचिवस्तर) छन् ।
खबर पढेर तपाईलाई कस्तो महसुस भयो ?
मन पर्यो (१००%)
मन परेन (०%)
तटस्थ (०%)
रिस उठ्यो(०%)
प्रतिक्रिया दिनुहोस्