पूर्वाधार वाच, काठमाडौं।

गएको असोज महिनामा सुनकोसी नदीमा आएको बाढीले बगाएको पक्की पुलको विकल्पमा उक्त स्थानमा बेलिब्रिज निर्माण सुरु भएको छ । सगरमाथा लोकमार्गमा पर्ने सुनकोसी नदीमा रहेको फोक्सिनटारको पक्की पुल बाढीमा बगेपछि विकल्पको रुपमा बेलिब्रिज निर्माण सुरु भएको हो ।

सगरमाथा लोकमार्गबाट उदयपुर–खोटाङ जोड्ने फोक्सिन्टारको पक्की पुल बाढीले बगाएपछि सिधा यातयात अवरुद्ध बनेको थियो । उदयपुरको रौतामाई गाउँपालिका–५ फोक्सिनटार र खोटाङ जिल्लाको खोटेहाङ गाउँपालिका–९ को लिच्कीराम्चे बीचमा पर्ने सुनकोसी नदीमा अहिले सिधा यातयात सञ्चालनको लागि बेलिब्रिज निर्माण सुरु गरिएको सगरमाथा लोकमार्ग गाईघाट–दिक्तेल योजनाका कार्यालय प्रमुख डिई पशुपति ज्ञवालीले बताए ।

उनले भने, ‘आर्यन कन्ट्रक्सन मल्ट्रिप्रोज प्राइभेट लिमिटेड ठेक्का लिएर काम सुरु गरिसकेको छ । अहिले ढुंगा जम्मा गर्ने, वाल लगाउने लगायतका काम भइरहेको छ । सम्भवत एक महिनाभित्र बेलिब्रिज निर्माण भएर सञ्चालनमा आउने छ ।’

उनका अनुसार बेलिब्रिज निर्माणको लागि आर्यन कन्ट्रक्सन मल्ट्रिप्रोज प्राइभेट लिमिटेडले एक करोड दुईलाख ९४ हजार ६७७ रुपैँया ७८ पैसामा ठेक्का लिएर काम सुरु गरिसकेको छ ।

निर्माण सम्पन्न भएर दुई वर्ष अघिमात्र सञ्चालनमा आएको फोक्सिनटारको आर्क ब्रिज डिजाइनको पुल बाढीले बगाएपछि उदयपुर र खोटाङको सिधा यातयात अवरुद्ध भएको थियो ।

पुल बगेको स्थानमा बन्न लागेको बेलिब्रिजको सामान पुरानै अवस्थामा रहेकाले बेलिब्रिज निर्माण छिटो हुने सगरमाथा लोकमार्ग गाईघाट–दिक्तेल योजनाका कार्यालय प्रमुख डिई ज्ञवालीले बताए ।

११ करोड ६० लाखको लागतमा निर्माण भएको यो पक्की पुल सुरुमा गाईघाट–दिक्तेल सडक योजना कार्यालय र पछि पुल सेक्टर १ धरान–इटहरीको सुपरिवेक्षणमा बनेको थियो ।

ठेकेदार कम्पनीको ढिलासुस्तीका कारण ९ वर्षमा बल्ल निर्माण सम्पन्न भएको भए पनि पुल सरकारलाई हस्तान्तरण गरिनसकेकै अवस्थामा सुनकोसी नदीमा आएको बाढीले बगाएको थियो ।

पक्की पुल बगेपछि फोक्सिन्टारमा यातायात ठप्प हुँदा यात्रुहरूले झोलुङ्गे पुलको साहारा लिदैँ आएका छन् । पूर्वी नेपाल तथा गाईघाटबाट खोटाङ चल्ने ठूला सुवारी साधानले गाईघाट कटारी हुँदै सिद्धिचरण लोकमार्ग भएर खोटाङको दिक्तेल पुग्ने गरेका छन् ।

प्रतिक्रिया दिनुहोस्