पूर्वाधार वाच, रसुवा ।

लाङ्टाङ राष्ट्रिय निकुञ्जको जङ्गलमा लागेको डढेलो नियन्त्रणका लागि पहिलोपटक दमकल प्रयोग गरिएको छ । निकुञ्जका वरिष्ठ संरक्षण अधिकृत श्यामकुमार शाहका अनुसार गोसाइँकुण्ड गाउपालिका—५ सानू र ठूलोभार्खुबीचको जङ्गलमा लागेको डढेलो नियन्त्रबाहिर गएपछि जिल्ला विपद् व्यवस्थापन समितिको सहयोगमा दमकल प्रयोग गरिएको हो ।

त्यसका लागि नुवाकोटको विदुर नगरपालिकाबाट दमकल मगाइएको उनले जानकारी दिए । पासाङल्हामु मार्गको डिलबाट दमकलले डढेलो निभाउनका लागि प्रयास भइरहेको वरिष्ठ संरक्षण अधिकृत शाहले बताए ।

नागरिक समाज रसुवाका अध्यक्ष बाबुलाल तामाङले जङ्गलमा लागेको डढेलो नियन्त्रणका लागि रसुवामै पहिलोपटक दमकल प्रयोग भएको जानकारी दिए।

नेपाली सेना, नेपाल प्रहरी र सशस्त्र प्रहरीसहित ठूलो सङ्ख्यामा आगो नियन्त्रणको प्रयास गरिए पनि हावाहुरी र बढी भिरपाखो भएका कारण परिस्थिति काबुभन्दा बाहिर गएपछि दमकल मगाइएको वरिष्ठ संरक्षण अधिकृत शाहले बताए ।

सुरक्षा अङ्गले मानव वस्तीलाई संरक्षण गरिरहेको र हालसम्म कुनै मानवीय क्षति भने नभएको प्रहरीले जनाएको छ ।

प्रतिक्रिया दिनुहोस्