पूर्वाधार वाच, काठमाडौं ।

राष्ट्रिय निजी तथा आवासीय विद्यालय एसोसिएसन नेपाल (नेशनल प्याब्सन), काठमाडौँले २०८२ सालको खेलकुद सप्ताह आयोजना गर्ने तयारी पूरा भएको जनाएको छ। काठमाडौँ जिल्ला समिति, खेलकुद विभाग तथा सम्बन्धित शाखाहरूको सहकार्यमा हुन लागेको यो कार्यक्रमबारे आज आयोजित पत्रकार भेटघाट कार्यक्रममा विस्तृत जानकारी सार्वजनिक गरिएको हो।

कार्यक्रममा नेशनल प्याब्सन काठमाडौँका अध्यक्षलाई स्वागत गर्दै पदाधिकारीहरूले यस पटकको खेलकुद सप्ताहलाई सबै सदस्य विद्यालयको सक्रिय सहभागिता, व्यवस्थित समन्वय र नयाँ ऊर्जाका साथ सम्पन्न गर्ने तयारी रहेको बताए।

मंसिर २२ गते भव्य उद्घाटन समारोह

नेशनल प्याब्सनले मंसिर २२ गते काठमाडौँमा विशेष उद्घाटन समारोह आयोजना गर्नेछ। सो अवसरमा खेलकुद सप्ताह–२०८२ को आधिकारिक सुरुवात गरिनेछ। उद्घाटन समारोहमा काठमाडौँका प्रमुख जिल्ला अधिकारी, सरकारी निकायका प्रतिनिधि, शिक्षा क्षेत्रका व्यक्तित्व तथा सदस्य विद्यालयका प्रतिनिधिहरूको उपस्थिति रहनेछ।

एक सातासम्म विविध खेल प्रतियोगिता

खेलकुद सप्ताह एक साता चल्नेछ र यस अवधिमा सदस्य विद्यालयबीच विभिन्न खेल प्रतियोगिताहरू आयोजना गरिनेछ। सम्बन्धित विद्यालयहरूलाई स्पष्ट सूचना, प्रतियोगिताका नियम, खेल मैदान तथा आवश्यक तालिका उपलब्ध गराइसकिएको आयोजकले जनाएको छ।

निःशुल्क सहभागिता र आकर्षक पुरस्कार

प्रतियोगितामा सदस्य विद्यालयहरूले निःशुल्क सहभागी हुन पाउनेछन्। प्रतियोगितामा प्रथम, द्वितीय र तृतीय स्थान हासिल गर्ने टोलीहरूलाई क्रमशः रू ५,०००, रू ३,०००, रू २,००० नगद पुरस्कार प्रदान गरिनेछ। अन्य श्रेणीका खेलहरूको शुल्क तथा पुरस्कारसम्बन्धी विवरण पनि विद्यालयहरूलाई आधिकारिक रूपमा उपलब्ध गराइएको छ।

समन्वयका लागि समिति गठन

जिल्ला उपाध्यक्ष नरायणप्रसाद निरौला, खेलकुद विभाग प्रमुख, समय र तालिका व्यवस्थापन समिति, रेफ्री तथा प्रशिक्षक टिम लगायत सबै संयोजकलाई जिम्मेवारी तोकिएको जनाइएको छ।
काठमाडौँको फुडबास्केट, ओजिएस स्कूल, कभ्स क्लबलगायत संस्थाहरूले खेल मैदान तथा अन्य व्यवस्थापनमा सहयोग गर्नेछन्।

व्यापक तयारी र पारदर्शितामा जोड

आयोजक समितिले खेलकुद सप्ताहलाई सफल बनाउन आवश्यक सबै तयारी पूरा भएको बताएको छ। समितिले सदस्य विद्यालयहरू, विद्यार्थी, अभिभावक तथा सञ्चार माध्यमहरूको सहकार्यले प्रतियोगितालाई अझ भव्य र अनुकरणीय बनाउने विश्वास व्यक्त गरेको छ।

कार्यक्रम संयोजक प्रेम कुमार भुजेलले खेलकुद सप्ताहका माध्यमबाट विद्यार्थीको शारीरिक, मानसिक र सामाजिक विकासमा सघाउ पुग्ने बताउँदै सम्पूर्ण सदस्य विद्यालयहरू, विद्यार्थी तथा सरोकारवालालाई सक्रिय सहभागिताको आग्रह गरेका छन्।

प्रतिक्रिया दिनुहोस्