पूर्वाधार वाच, काठमाडौं।

नेपाल वास्तुविद् समाज (सोना) र ख्वप इन्जिनियरिङ कलेज भक्तपुरबीच द्वीपक्षीय समझदारी पत्रमा हस्ताक्षर भएको छ । शिक्षा, अनुसन्धान र अन्तरसंस्थागत सहकार्य प्रवर्द्धन गर्ने उद्देश्यले उक्त समझदारी भएको सोनाले जनाएको छ ।

यस समझदारीपत्रको माध्यमबाट दुवै संस्थाले शिक्षा स्तर उन्नयन, अनुसन्धान अभ्यास प्रोत्साहन, विद्यार्थीहरूको इन्टर्नसिप सुविधाजनक बनाउने, अन्तरदेशीय अध्ययन आदानप्रदानलाई प्रवर्द्धन गर्ने र संयुक्त कार्यक्रम तथा परियोजनामा सहकार्य गर्ने प्रतिबद्धता जनाएका छन्।

कार्यक्रममा सोनाका पदाधिकारी र ख्वप इन्जिनियरिङ कलेजका प्रतिनिधिहरुको उपस्थिति रहेको थियो। दुवै संस्थाका प्रतिनिधिहरूले यो सहकार्यले भविष्यमा प्राविधिक शिक्षा र व्यावसायिक विकासमा महत्वपूर्ण योगदान पुर्‍याउने विश्वास व्यक्त गरेका छन्।

सम्झौताअनुसार, विद्यार्थीहरूलाई विभिन्न अनुसन्धान परियोजनामा संलग्न गराउने, तालिम र कार्यशालाको आयोजना गर्ने र अनुभव तथा सीप आदानप्रदान गर्ने जस्ता कार्यहरू प्राथमिकतामा पर्नेछन्।
यस समझदारीले नेपाली इन्जिनियरिङ तथा वास्तुकला शिक्षामा गुणस्तर अभिवृद्धि गर्दै राष्ट्रिय तथा अन्तर्राष्ट्रिय स्तरमा प्रतिस्पर्धी बनाउने अपेक्षा गरिएको छ।

प्रतिक्रिया दिनुहोस्