पूर्वाधार वाच,काठमाण्डौं।

नेपाली राष्ट्रिय पुरुष क्रिकेट टोलीले स्कटल्याण्डमा जारी त्रिकोणात्मक टि२०आई सिरिज अन्तर्गत आज घरेलु टोलीको सामना गर्दैछ ।

नेपाली समयअनुसार रातको ७:४५ बजे सुरु हुने खेलमा नेपाल सिरिजको पहिलो जितको खोजीमा हुनेछ ।

सोमबार भएको खेलमा नेपाल नेदरल्यान्ड्ससँग तेस्रो सुपर ओभरमा पराजित भएको थियो ।

यता स्कटल्याण्डले भने पहिलो खेलमा नेदरल्यान्ड्सलाई ३९ रनले पराजित गरेको थियो । अंक तालिकामा स्कटल्याण्ड २ अंकसाथ शीर्ष स्थानमा छ । नेपालले भने खाता खोल्न बाँकी छ ।

नेपालले नेदरल्यान्ड्सविरुद्ध खेलमा किरण ठगुन्ना र रुपेश सिंहलाई डेब्यु दिएको थियो । दुवैका लागि उक्त खेल सम्झनलायक भने रहेन ।

आजको खेलमा टोलीमा केही परिवर्तन हुने सम्भावना छ । तीव्र गतिका बलर नन्दन यादवले हिजोको खेलमा चोट बोकेका कारण आज विश्राम लिन सक्छन् ।

नेपालका लागि हिजो रिजन ढकाल, भिम सार्की, आरिफ शेख, बसीर अहमद र आसिफ शेख बेन्चमा रहेका थिए । आज रिजन ढकालले अवसर पाउने सम्भावना छ ।

 

प्रतिक्रिया दिनुहोस्