इजरायली दुई मानवअधिकारवादी संस्थाहरूले आफ्नै सरकारमाथि प्यालेस्टिनीहरूको सामूहिक हत्या (नरसंहार)को आरोप लगाएका छन्। भोकका कारण ज्यान गुमाइरहेका गाजाका बालबालिकाका कथाहरू सार्वजनिक भएपछि धेरै देशहरूले इजरायल सरकारमाथि दबाब बढाएका छन् ।

पूर्वाधार वाच, काठमाडौं ।

इजरायली प्रधानमन्त्री बेन्यामिन नेतन्याहूमाथि अन्तर्राष्ट्रिय दबाब दिन प्रतिदिन बढिरहेको छ। सोमबार नेदरल्याण्ड्सले इजरायलका राजदूतलाई तलब गरेको छ। गाजामा झनझनै भयावह बन्दै गइरहेका अवस्थाबीच नेदरल्याण्ड्सका विदेश मन्त्री कास्पर फेल्डकाम्पले सोमबार राति इजरायल सरकारलाई एक पत्र लेखेका छन्। सो पत्रमा इजरायलका दुई मन्त्रीहरूमाथि यात्रा प्रतिबन्ध लगाइएको जानकारीसहित थप कदमहरूको विवरण उल्लेख गरिएको छ। पत्रमा स्पष्ट रूपमा लेखिएको छस् ‘गाजामा युद्ध तुरुन्त रोकिनुपर्छ।’

नेदरल्याण्ड्सले इजरायलका राष्ट्रिय सुरक्षा मन्त्री इतमार बेनग्विर र अर्थमन्त्री बेजालेल स्मोट्रिषमाथि यात्रा प्रतिबन्ध लगाएको हो। यी दुवै नेताहरू अतिवादी दक्षिणपन्थी हुन् र प्रधानमन्त्री नेतन्याहूको गठबन्धन सरकारका मुख्य साझेदार मानिन्छन्।

उनीहरू इजरायली बस्तीहरूको विस्तार र गाजामा युद्ध जारी राख्नका कट्टर समर्थक हुन्। यसअघि गत जुन महिनामा, ब्रिटेन, अस्ट्रेलिया, क्यानडा, न्यूजील्याण्ड र नर्वेले पनि यी दुई नेतामाथि आर्थिक प्रतिबन्ध लगाइसकेका छन्।

मंगलवार साँझ युरोपेली सङ्घ (ईयू)को मुख्यालय ब्रसेल्समा ईयूका नेताहरूबीच बैठक हुने तयारी छ। उक्त बैठकमा इजरायलप्रति युरोपेली सङ्घको औपचारिक प्रतिक्रिया र नीति सम्बन्धी छलफल हुने जनाइएको छ।

समाचार संस्था एपीका अनुसार, बैठकको एजेन्डामा इजरायलसँग भएको युरोपेली सङ्घको व्यापारिक सम्झौताको पुनरावलोकन पनि समावेश गरिएको छ। नेदरल्याण्ड्सले इजरायलसँगको व्यापार सम्झौताका केही धाराहरू निलम्बन गर्नुपर्ने प्रस्ताव राखेको छ।

यसैबीच, विश्वका ठूला र प्रभावशाली देशहरू इजरायल र अमेरिकाको असन्तोषको प्रवाह नगरी मध्यपूर्वमा दुई राष्ट्र समाधानको खुलेर समर्थन गर्न थालेका छन्।

इजरायली नेताहरूको प्रतिवाद

बढ्दो अन्तर्राष्ट्रिय दबाबका बीच, इजरायली मन्त्री इतमार बेनग्विर र बेजालेल स्मोट्रिष अझै पनि आफ्नै कठोर धारणा कायम राखिरहेका छन्। यी दुवै नेताले युरोपमाथि व्यंग्य पनि गरेका छन्। सामाजिक सञ्जालमा सार्वजनिक गरिएको एक विज्ञप्तिमा अर्थमन्त्री स्मोट्रिषले भनेका छन्, ‘युरोपेली नेताहरू कट्टरपन्थी इस्लामका झूटा कथाहरूको अगाडि आत्मसमर्पण गरिरहेका छन्।’

त्यस्तै, राष्ट्रिय सुरक्षा मन्त्री बेन-ग्विरले आरोप लगाएका छन्, ‘युरोपमा इजरायलको यहूदी मन्त्रीलाई अवाञ्छनीय मानिन्छ, तर आतङ्ककारीहरू स्वतन्त्र छन् र यहूदीहरूको बहिष्कार भइरहेको छ।’

७ अक्टोबर २०२३ मा इजरायलमा हमासको आक्रमणपछि इजरायलले गाजामा हमास विरुद्ध युद्ध सुरु गरेको छ। तर विगत केही महिनादेखि यो युद्ध गाजाको पूर्ण घेराबन्दीमा परिणत भएको छ। धेरै देश र संस्थाहरूले इजरायललाई गाजामा अनिकाल जस्तो अवस्था सिर्जना गरेको आरोप लगाइरहेका छन्। हालैका महिनाहरूमा यसका धेरै प्रमाणहरू पनि बाहिर आएका छन्।

इजरायलले गाजामा प्यालेस्टिनीहरूलाई राहत सामग्री पुग्न नदिएको र यसका लडाकुहरूले यस्तो सहायता लुटिरहेको दाबी गरिरहन्छ। संयुक्त राष्ट्रसंघले योजनाबद्ध लुटपाटको यी इजरायली दाबीहरूलाई अस्वीकार गरेको छ।

गाजाबाट यस्ता धेरै भिडियोहरू आइरहेका छन् जसमा भोकमरीको कारण बालबालिकाहरू जीवित कंकाल जस्तै देखिन्छन्। युद्धले तहसनहस भएको क्षेत्रमा हरेक दिन मानिसहरू खानाको लागि एकअर्कामाथि चढेको देखिन्छ।

यस्ता प्रमाणहरू बाहिर आएपछि धेरै युरोपेली सरकारहरूमाथि पनि दबाब बढ्दै गएको छ। अक्टोबरमा नेदरल्याण्ड्समा चुनाव हुँदैछ। गत हप्ता हजारौं मानिसहरूले गाजामा भोकमरीको विरुद्ध देशका धेरै भागहरूमा विशाल प्रदर्शन गरे।

इजरायली सरकारमाथि नरसंहारको आरोप 

इजरायली मानव अधिकार एनजीओ, बेतसेलम र फिजिसियन्स फर ह्युमन राइट्सले सोमबार जेरुसेलममा पत्रकार सम्मेलनको क्रममा इजरायली सरकारमाथि नरसंहारको आरोप लगाएका छन्। दुई संस्थाको प्रतिवेदनमा भनिएको छ, इजरायलले ‘योजनाबद्ध रूपमा, जानाजानी गाजा पट्टीमा प्यालेस्टिनी समाजलाई नष्ट गर्न खोजेको छ।’

बेतसेलमका कार्यकारी निर्देशक युली नोभाकले भने, ‘आज हामीले जारी गरिरहेको प्रतिवेदन हामीले कहिल्यै कल्पना गरेका थिएनौं कि हामीले लेख्नुपर्नेछ। गाजाका मानिसहरूले विस्थापन, बम विष्फोट, भोकमरी भोगेका छन् र उनीहरूको मानव अधिकारबाट वञ्चित छन्।’

फिजिसियन्स फर ह्युमन राइट्सले गाजामा चिकित्सा सेवाहरूमाथि इजरायलको दमनप्रति ध्यानाकर्षण गराउँदै भने, ‘इजरायलले गाजाको स्वास्थ्य पूर्वाधार नष्ट गर्ने कार्यहरू योजनाबद्ध रूपमा गरिएको छ।’

इजरायली प्रधानमन्त्री नेतान्याहूले अहिलेसम्म नरसंहारको आरोपको कडा निन्दा  गर्दै आएका छन्। उनले बारम्बार इजरायलको आत्मरक्षाको अधिकारलाई उद्धृत गरिरहेका छन्। इजरायली सरकारका प्रवक्ताले दुई गैरसरकारी संस्थाहरूको पछिल्लो रिपोर्टलाई ‘निराधार’ भनेर वर्णन गरेका छन्।

(विभिन्न अन्तराष्ट्रिय समाचार एजेन्सीहरुको सहयोगमा)

प्रतिक्रिया दिनुहोस्