पूर्वाधार वाच, ललितपुर ।

एजेन्डा फर चेन्ज (Agenda for Change–A4C) नेपालद्वारा आयोजना गरिएको वास (पानी, सरसफाइ तथा स्वच्छता) प्रणाली सुदृढीकरणसम्बन्धी राष्ट्रियस्तरीय कार्यशाला आज सफलतापूर्वक सम्पन्न भएको छ । कार्यशालामा नेपालमा वास प्रणाली सुदृढीकरणका क्षेत्रमा हालसम्म भएका प्रगतिहरूको समीक्षा गर्दै दीगो सेवा प्रवाहका लागि आगामी कार्यदिशाबारे गहन छलफल गरिएको थियो ।

विविध सरोकारवालाको उल्लेख्य सहभागिता

कार्यशालामा संघीय सरकारका सम्बन्धित निकाय, विकास साझेदार, दाता संस्था, राष्ट्रिय तथा अन्तर्राष्ट्रिय गैरसरकारी संस्था, निजी क्षेत्र, शैक्षिक क्षेत्र र सञ्चारमाध्यमका प्रतिनिधिसहित करिब ५०–६० जना सहभागी थिए । वास क्षेत्रमा क्रियाशील सरोकारवालाबीच अनुभव आदान–प्रदान, प्रणालीगत चुनौती पहिचान तथा आपसी समन्वय सुदृढ गर्ने उद्देश्यले कार्यक्रम आयोजना गरिएको आयोजकले जनाएको छ ।

एजेन्डा फर चेन्जको साझा पहल

एजेन्डा फर चेन्ज समान सोच भएका संस्थाहरूको साझा पहल हो, जसले वास सेवा प्रवाहमा प्रणालीगत दृष्टिकोणलाई प्रवर्द्धन गर्दै आएको छ । नेपालमा सन् २०१५ मा चार संस्थाबाट सुरु भएको यो पहल हाल WaterAid Nepal, FEDWASUN, Welthungerhilfe (WHH), Simavi, Helvetas, CARE Nepal, Terre des Hommes (Tdh), Oxfam Nepal र WASH Khabar सहित नौ साझेदार संस्थाको सहकार्यमा विस्तार भएको छ ।

प्रणालीगत सुधारमा जोड

यस सहकार्यको मुख्य उद्देश्य दिगो विकास लक्ष्य–६ अनुरूप सुरक्षित, समावेशी र दिगो वास सेवा सुनिश्चित गर्न राष्ट्रिय तथा स्थानीय सरकारलाई सहयोग पुर्‍याउनु हो । संघीय संरचनाअन्तर्गतको जटिल वास शासन प्रणालीलाई ध्यानमा राख्दै A4C नेपालले नीति सुधार, संस्थागत क्षमता अभिवृद्धि, वित्तीय संयन्त्र, अनुगमन प्रणाली तथा सेवा प्रवाह व्यवस्थापन सुदृढीकरणमा निरन्तर जोड दिँदै आएको छ ।

रोडम्याप र मार्गदर्शन पुस्तिका सार्वजनिक

कार्यशालामा A4C नेपाल तथा साझेदार संस्थाहरूले वास प्रणाली सुदृढीकरणका क्षेत्रमा हासिल उपलब्धि, सिकाइ र अनुभवहरू प्रस्तुत गरेका थिए । कार्यक्रमको विशेष आकर्षणका रूपमा A4C वास प्रणाली सुदृढीकरण रोडम्याप तथा यससँग सम्बन्धित मार्गदर्शन पुस्तिका र ढाँचाहरूको औपचारिक सार्वजनिकरण गरिएको थियो । यी दस्तावेजहरूले संघ, प्रदेश र स्थानीय तहमा वास योजना, समन्वय र कार्यान्वयन सुधारका लागि स्पष्ट दिशा प्रदान गर्ने अपेक्षा गरिएको छ ।

आगामी कार्यदिशाबारे सहमति

अन्तर्क्रियात्मक प्रश्न–उत्तर सत्र तथा समूह छलफलमार्फत सहभागीहरूले रोडम्यापमा सुझाव प्रस्तुत गर्दै राष्ट्रिय वास प्राथमिकतासँग समन्वय गरी संयुक्त रूपमा अघि बढ्नुपर्नेमा जोड दिएका थिए । कार्यशालाको निष्कर्षमा नेपालमा वास क्षेत्रको दीर्घकालीन प्रगति सरकारी नेतृत्व, पर्याप्त वित्तीय स्रोत, संस्थागत सुदृढीकरण तथा प्रणालीगत दृष्टिकोणप्रतिको दीर्घकालीन प्रतिबद्धतामा निर्भर रहने साझा धारणा व्यक्त गरिएको छ ।

सुरक्षित पानी र सरसफाइमा सबै नागरिकको पहुँच सुनिश्चित गर्ने लक्ष्यतर्फ अग्रसर नेपालका लागि एजेन्डा फर चेन्जजस्ता पहलहरू दिगो र समावेशी वास प्रणाली निर्माणतर्फको महत्वपूर्ण कदम भएको सरोकारवालाहरूले बताएका छन् ।

प्रतिक्रिया दिनुहोस्