images
images
images
images

बिन्ध्यवासिनी हाइड्रोपावरको १०औँ साधारणसभा सम्पन्न, ५ प्रतिशत बोनस र १ः१ हकप्रद सेयर पारित

images

पूर्वाधार वाच, काठमाडौं ।

बिन्ध्यवासिनी हाइड्रोपावर डेभलपमेन्ट कम्पनी लिमिटेडको दसौँ वार्षिक साधारणसभा सम्पन्न भएको छ । कार्तिक १८ गते काठमाडौंको शंखमूलस्थित अनमोल ब्याङ्क्वेटमा आयोजित सभाले सेयरधनीलाई ५ प्रतिशत बोनस सेयर वितरण गर्ने र १ः१ अनुपातमा हकप्रद सेयर निष्कासन गर्ने प्रस्ताव पारित गरेको छ ।

images

सभाले आर्थिक वर्ष २०८२/०८३ को सञ्चालक समितिको वार्षिक प्रतिवेदन, लेखापरीक्षकको प्रतिवेदनसहित वासलात, नाफा–नोक्सान हिसाब तथा नगद प्रवाह विवरण छलफल गरी अनुमोदन गरेको छ । साथै, बोनस सेयरमा लाग्ने कर प्रयोजनका लागि चुक्ता पुँजीको ०.२६३२ प्रतिशत नगद लाभांश वितरण गर्ने प्रस्तावसमेत पारित गरेको छ ।

कम्पनीले पुँजी संरचना सुदृढ बनाउने र आगामी आयोजना तथा व्यावसायिक योजनाका लागि आवश्यक वित्तीय स्रोत जुटाउने उद्देश्यले बोनस र हकप्रद सेयर निष्कासनको प्रस्ताव अघि बढाएको जनाएको छ । पारित प्रस्तावअनुसार हाल कायम सेयरधनीले आफूसँग रहेको प्रत्येक एक कित्ता सेयर बराबर थप एक कित्ता हकप्रद सेयर प्राप्त गर्नेछन् । हकप्रद निष्कासनका लागि आवश्यक नियामकीय प्रक्रिया भने पूरा गर्नुपर्नेछ ।

डिबेन्चर निष्कासन र प्रबन्धपत्र संशोधन प्रस्ताव पनि पारित

साधारणसभाले साधारण सेयरमा परिणत गर्न सकिने गरी ऋणपत्र (डिबेन्चर) निष्कासन गर्ने तथा त्यसबाट प्राप्त रकम उपयोग गर्ने प्रस्तावसमेत पारित गरेको छ ।

त्यसैगरी, कम्पनीको प्रबन्धपत्र तथा नियमावलीका विभिन्न दफा संशोधन गर्ने र आर्थिक वर्ष २०८२/०८३ मा सञ्चालक समितिबाट कम्पनीको व्यवसाय सञ्चालन, लगानी, ऋण तथा कर्पोरेट ग्यारेन्टीसम्बन्धी भएका निर्णय र कार्यलाई अनुमोदन गर्ने प्रस्ताव पनि सभाबाट पारित भएको छ ।

सभाले आर्थिक वर्ष २०८३/०८४ का लागि जे.पी.एन. एन्ड एसोसिएट्स, चार्टर्ड एकाउन्टेन्ट्सलाई लेखापरीक्षक नियुक्त गर्ने तथा पारिश्रमिक निर्धारण गर्ने प्रस्तावसमेत स्वीकृत गरेको छ ।

रुदी खोलाका दुई आयोजनाबाट १५.४ मेगावाट विद्युत् उत्पादन

बिन्ध्यवासिनी हाइड्रोपावरले कास्की र लमजुङ जिल्लाको सीमाक्षेत्रमा रहेका रुदी खोला ‘ए’ र रुदी खोला ‘बी’ जलविद्युत् आयोजनामार्फत विद्युत् उत्पादन गर्दै आएको छ ।

कम्पनीको आधिकारिक वेबसाइटअनुसार रुदी खोला ‘ए’ आयोजनाको क्षमता ८.८ मेगावाट र रुदी खोला ‘बी’ आयोजनाको क्षमता ६.६ मेगावाट रहेको छ । दुवै आयोजनाको कुल जडित क्षमता १५.४ मेगावाट छ ।

रुदी खोला ‘ए’ आयोजनाको पावरहाउस कास्की जिल्लाको मादी गाउँपालिका क्षेत्रमा रहेको छ भने यसको हेडपोन्ड तथा पानी संकलन संरचनाहरू लमजुङको क्व्होलासोथार गाउँपालिका क्षेत्रमा रहेका छन् । रुदी खोला ‘बी’ आयोजना पनि लमजुङको क्व्होलासोथार गाउँपालिका क्षेत्रमा अवस्थित छ ।

विद्युत् बिक्रीबाट ४५ करोड ५२ लाख आम्दानी

कम्पनीको वार्षिक प्रतिवेदनअनुसार आर्थिक वर्ष २०८२/०८३ मा विद्युत् बिक्रीबाट ४५ करोड ५२ लाख ७० हजार ६७३ रुपैयाँ आम्दानी भएको छ । यस अवधिमा लाभांश, बैंक मौज्दातको ब्याज तथा ऋण र अग्रिम रकमबाट प्राप्त ब्याजलगायत अन्य स्रोतबाट ४२ लाख ८४ हजार ५३१ रुपैयाँ आम्दानी भएको विवरणमा उल्लेख छ ।

समीक्षा वर्षमा कम्पनीको बैंक ब्याज खर्च १२ करोड १७ लाख ३८ हजार ६१७ रुपैयाँ रहेको छ । त्यस्तै, मर्मतसम्भारमा १ करोड ७५ लाख ३६ हजार ८२७ रुपैयाँ र अन्य व्यवस्थापन खर्चमा ५ करोड ९८ लाख ३६ हजार १५३ रुपैयाँ खर्च भएको प्रतिवेदनमा उल्लेख छ ।

कम्पनीको अधिकृत पुँजी २ अर्ब ५० करोड रुपैयाँ, जारी पुँजी २ अर्ब ३७ करोड २५ लाख ८० हजार रुपैयाँ र चुक्ता पुँजी १ अर्ब १८ करोड ६२ लाख ९० हजार रुपैयाँ रहेको छ ।

पुँजी वृद्धि र वित्तीय स्रोत व्यवस्थापनमा जोड

कम्पनीले सञ्चालनमा रहेका जलविद्युत् आयोजनाबाट विद्युत् उत्पादन तथा बिक्री गर्दै आएको अवस्थामा आगामी व्यावसायिक आवश्यकता पूरा गर्न पुँजी वृद्धि र वैकल्पिक वित्तीय स्रोत परिचालनलाई प्राथमिकता दिएको देखिन्छ ।

५ प्रतिशत बोनस सेयरले चुक्ता पुँजीमा वृद्धि गर्नेछ भने प्रस्तावित १ः१ हकप्रद सेयरबाट थप पुँजी जुटाउन सहयोग पुग्नेछ । त्यसैगरी, डिबेन्चर निष्कासनसम्बन्धी प्रस्तावले पनि कम्पनीलाई आवश्यक वित्तीय स्रोत परिचालनका लागि अर्को विकल्प उपलब्ध गराउने अपेक्षा गरिएको छ ।

कम्पनीको दसौँ साधारणसभाबाट पारित यी प्रस्तावले आगामी आयोजना विकास, वित्तीय व्यवस्थापन तथा व्यावसायिक विस्तारका लागि आधार तयार गर्ने अपेक्षा गरिएको छ ।

खबर पढेर तपाईलाई कस्तो महसुस भयो ?

मन पर्‍यो (१००%)

मन परेन (०%)

तटस्थ (०%)

रिस उठ्यो(०%)

प्रतिक्रिया दिनुहोस्