images
images
images
images

वैकल्पिक ऊर्जा प्रवर्द्धन केन्द्रको ३०औँ स्थापना दिवस सम्पन्न, नवीकरणीय ऊर्जालाई अर्थतन्त्रसँग जोड्नुपर्नेमा जोड

images

पूर्वाधार वाच, काठमाडौं ।

वैकल्पिक ऊर्जा प्रवर्द्धन केन्द्र (एईपीसी) को ३०औँ स्थापना दिवस विशेष समारोहका साथ सम्पन्न भएको छ । काठमाडौंको ताहाचलस्थित केन्द्रको कार्यालय परिसरमा बुधबार आयोजित कार्यक्रममा नवीकरणीय ऊर्जालाई राष्ट्रिय अर्थतन्त्र, उत्पादन, उद्यमशीलता र रोजगारी सिर्जनासँग जोड्दै मुलुकको ऊर्जा सुरक्षा सुदृढ बनाउनुपर्नेमा जोड दिइएको छ ।

images

ऊर्जा, जलस्रोत तथा सिँचाइमन्त्री विराजभक्त श्रेष्ठको प्रमुख आतिथ्यतामा सम्पन्न समारोहमा नवीकरणीय ऊर्जाको विकासलाई अनुदान तथा ऊर्जा पहुँच विस्तारमा मात्र सीमित नराखी निजी क्षेत्रको लगानी, स्थानीय उद्यमशीलता, ऊर्जा दक्षता र आर्थिक समृद्धिको आधारका रूपमा अघि बढाउनुपर्ने धारणा व्यक्त गरिएको थियो ।

नवीकरणीय ऊर्जा आर्थिक समृद्धिको आधार बन्नुपर्छ : मन्त्री श्रेष्ठ

कार्यक्रमलाई सम्बोधन गर्दै मन्त्री श्रेष्ठले नवीकरणीय ऊर्जाको प्रवर्द्धनमार्फत नेपालको ऊर्जा सुरक्षा मजबुत बनाउनुका साथै राष्ट्रिय अर्थतन्त्रमा सकारात्मक योगदान पुर्‍याउनुपर्ने बताए ।

उनले स्वच्छ ऊर्जाको प्रयोग विस्तारलाई उत्पादन वृद्धि, रोजगारी सिर्जना तथा उद्यमशीलताको विकाससँग जोड्नुपर्ने आवश्यकता औँल्याउँदै वैकल्पिक ऊर्जाका कार्यक्रमलाई आर्थिक गतिविधिसँग एकीकृत गरेर अघि बढाउनुपर्ने धारणा राखे ।

मन्त्री श्रेष्ठले ‘एलपी ग्यासमुक्त पालिका’ अवधारणालाई कार्यान्वयनमा ल्याउन आवश्यक तयारी थाल्न केन्द्रलाई निर्देशनसमेत दिए । उक्त अवधारणाले स्वच्छ ऊर्जाको प्रयोग बढाउनुका साथै आयातित एलपी ग्यासमाथिको निर्भरता घटाउन र स्थानीय स्तरमा उपलब्ध ऊर्जा स्रोतको उपयोग बढाउन सहयोग पुग्ने अपेक्षा गरिएको छ ।

तीन दशकदेखि नवीकरणीय ऊर्जा प्रवर्द्धनमा सक्रिय

वैकल्पिक ऊर्जा प्रवर्द्धन केन्द्रले स्थापनाको तीन दशक पूरा गर्दै नेपालमा नवीकरणीय ऊर्जाको विकास, ऊर्जा पहुँच विस्तार, ऊर्जा आत्मनिर्भरता तथा हरित अर्थतन्त्र निर्माणमा योगदान पुर्‍याउँदै आएको छ ।

स्थापना दिवसका अवसरमा केन्द्रले हालसम्म हासिल गरेका उपलब्धि, नवीकरणीय ऊर्जाको वर्तमान अवस्था तथा आगामी कार्यदिशाबारे जानकारी प्रस्तुत गरेको थियो । ग्रामीण तथा दुर्गम क्षेत्रमा स्वच्छ ऊर्जाको पहुँच विस्तारदेखि नवीकरणीय ऊर्जा प्रविधिको प्रवर्द्धनसम्म केन्द्रले विभिन्न कार्यक्रम सञ्चालन गर्दै आएको छ ।

निजी लगानी र स्थानीय उद्यमशीलता प्रवर्द्धनमा जोड

समारोहमा नवीकरणीय ऊर्जा क्षेत्रको दिगो विकासका लागि निजी क्षेत्रको लगानी आकर्षित गर्नुपर्ने, स्थानीय स्तरमा उद्यमशीलता प्रवर्द्धन गर्नुपर्ने तथा ऊर्जा प्रविधिको प्रयोगबाट आर्थिक गतिविधि विस्तार गर्नुपर्ने विषयलाई प्राथमिकताका साथ उठाइएको थियो ।

नवीकरणीय ऊर्जालाई उत्पादनमूलक क्षेत्रसँग जोड्न सके ऊर्जा खपतको लागत घटाउनुका साथै रोजगारीका नयाँ अवसर सिर्जना गर्न र स्थानीय अर्थतन्त्रलाई गतिशील बनाउन सकिने धारणा कार्यक्रममा व्यक्त गरिएको थियो ।

स्वच्छ ऊर्जा र ऊर्जा सुरक्षाको आगामी कार्यदिशा

नेपालमा जलविद्युत्, सौर्य ऊर्जा, बायोग्यासलगायत नवीकरणीय ऊर्जा स्रोतको सम्भावना रहेको अवस्थामा तिनको प्रभावकारी उपयोगमार्फत ऊर्जा सुरक्षालाई थप सुदृढ बनाउनुपर्नेमा कार्यक्रममा जोड दिइएको थियो ।

केन्द्रले आगामी दिनमा नवीकरणीय ऊर्जाको प्रवर्द्धन, ऊर्जा दक्षता अभिवृद्धि, स्वच्छ ऊर्जा प्रविधिको विस्तार तथा निजी क्षेत्रसँगको सहकार्यलाई थप प्रभावकारी बनाउँदै लैजाने अपेक्षा गरिएको छ ।

तीन दशकदेखि वैकल्पिक तथा नवीकरणीय ऊर्जाको विकासमा योगदान पुर्‍याउँदै आएको केन्द्रको आगामी यात्रा थप उपलब्धिमूलक, प्रभावकारी र दिगो बन्ने विश्वास व्यक्त गर्दै स्थापना दिवसका अवसरमा केन्द्रका कर्मचारी तथा सम्पूर्ण परिवारलाई शुभकामना व्यक्त गरिएको थियो ।

खबर पढेर तपाईलाई कस्तो महसुस भयो ?

मन पर्‍यो (१००%)

मन परेन (०%)

तटस्थ (०%)

रिस उठ्यो(०%)

प्रतिक्रिया दिनुहोस्