पूर्वाधार वाच, काठमाडौं ।

नयाँ बानेश्वर व्यापार व्यवसायी संघको १६औँ वार्षिक साधारण सभा तथा ८औँ अधिवेशन सफलतापूर्वक सम्पन्न भएको छ। अधिवेशनबाट संघको नेतृत्वका लागि नयाँ कार्यसमिति निर्वाचित गरिएको छ।

अधिवेशनको निर्णयअनुसार रमेशमान शाक्य संघको नयाँ अध्यक्षमा निर्वाचित भएका छन्। अध्यक्ष शाक्यको नेतृत्वमा निर्वाचित नयाँ कार्यसमितिले आगामी कार्यकालमा नयाँ बानेश्वर क्षेत्रका व्यापारीहरूको हकहित संरक्षण, व्यवसायिक वातावरण सुधार तथा संस्थागत सुदृढीकरणमा काम गर्ने प्रतिबद्धता व्यक्त गरेको छ।

कार्यक्रममा विभिन्न व्यवसायिक संघ–संस्थाका प्रतिनिधि, स्थानीय जनप्रतिनिधि, सुरक्षाकर्मी तथा व्यापारीहरूको उल्लेखनीय सहभागिता रहेको थियो। वक्ताहरूले संगठित व्यवसायिक समुदायले आर्थिक विकासमा खेल्ने भूमिकाबारे चर्चा गर्दै स्थानीय तहसँग सहकार्य गरी व्यापारीका समस्या समाधान गर्नुपर्नेमा जोड दिए।

साधारण सभामा संघको वार्षिक प्रतिवेदन, आर्थिक विवरण तथा भावी कार्ययोजनामाथि छलफल गरिएको थियो। सहभागीहरूले नयाँ नेतृत्वबाट संघलाई थप सशक्त, व्यवस्थित र प्रभावकारी बनाउने अपेक्षा व्यक्त गरेका छन्।

अधिवेशन आशा र उत्साहका साथ सम्पन्न भएको छ भने नयाँ नेतृत्वले व्यवसायिक एकता मजबुत बनाउँदै स्थानीय आर्थिक विकासमा सकारात्मक योगदान पुर्‍याउने विश्वास व्यक्त गरिएको छ।

प्रतिक्रिया दिनुहोस्