पूर्वाधार वाच 
पूर्वाधार वाच, काठमाडौं ।
बत्तिसपुतली–गौशाला व्यापार व्यवसायी संघको १६औँ वार्षिकोत्सव, भित्तेपात्रो विमोचन तथा नयाँ वर्षको शुभकामना आदान–प्रदान कार्यक्रम सफलतापूर्वक सम्पन्न भएको छ ।
विभिन्न सरोकारवालाको उल्लेखनीय सहभागिता
काठमाडौं महानगरपालिका वडा नं. ९ का अध्यक्ष रामजी भण्डारीको प्रमुख आतिथ्य तथा संघका अध्यक्ष डासुराम घिमिरेको अध्यक्षतामा आयोजित कार्यक्रममा विभिन्न व्यवसायी तथा सरोकारवालाहरूको उल्लेखनीय उपस्थिति रहेको थियो । कार्यक्रममा गौशाला प्रहरी वृत्तका प्रमुख डीएसपी प्रकाश श्रीमल, राष्ट्रिय व्यवसायी महासंघका अध्यक्ष मनोज बहादुर श्रेष्ठ, नयाँ बानेश्वर व्यापार संघका अध्यक्ष रमेशमान श्रेष्ठ, कोटेश्वर व्यवसायी संघका अध्यक्ष नीलप्रसाद घिमिरे तथा संघका संरक्षक देवीप्रसाद प्रसाईँलगायत सहभागी थिए ।
व्यवसायीको हकहित र सुरक्षामा प्रतिबद्धता
कार्यक्रममा प्रमुख अतिथि रामजी भण्डारीले नयाँ वर्षको अवसरमा सम्पूर्ण व्यवसायीहरूलाई शुभकामना व्यक्त गर्दै व्यवसायीहरूको हकहित, सुरक्षा तथा सहज व्यवसाय वातावरण निर्माणका लागि आवश्यक समन्वय गर्ने प्रतिबद्धता व्यक्त गरे ।
घरबहाल कर घटाउने पहल
संघका अध्यक्ष डासुराम घिमिरेले व्यवसायीहरूका समस्या समाधानमा संघ सक्रिय रहेको उल्लेख गर्दै घरबहाल कर घटाउने विषयमा पहल भइरहेको जानकारी दिए । उनले व्यवसायमैत्री वातावरण निर्माणका लागि सम्बन्धित सबै पक्षबीच सहकार्य आवश्यक रहेको धारणा राखे ।
सम्मान तथा कदर कार्यक्रम
कार्यक्रममा गौशाला प्रहरी वृत्तको पुनःनिर्माणमा सहयोग पुर्याउने व्यवसायीहरूलाई सम्मान गरिएको थियो । साथै संघलाई विज्ञापनमार्फत सहयोग गर्ने व्यवसायीहरूलाई कदरपत्र प्रदान गर्दै सम्मान गरिएको थियो ।
सहकार्य र एकतामा जोड
संघका सचिव गोपिकृष्ण बडालले कार्यक्रम सञ्चालन गरेका थिए भने प्रथम उपाध्यक्ष अर्जुन कोइरालाले स्वागत मन्तव्य व्यक्त गरेका थिए ।
कार्यक्रम सौहार्दपूर्ण वातावरणमा सम्पन्न भएको थियो । सहभागीहरूले आपसी सहकार्य, एकता र समन्वयमार्फत व्यवसाय क्षेत्रलाई अझ सुदृढ बनाउने प्रतिबद्धता व्यक्त गरेका छन् ।
खबर पढेर तपाईलाई कस्तो महसुस भयो ?
मन पर्यो (१००%)
मन परेन (०%)
तटस्थ (०%)
रिस उठ्यो(०%)
प्रतिक्रिया दिनुहोस्