पूर्वाधार वाच, ललितपुर ।

युनाइटेड मोदी हाइड्रोपावर लिमिटेडको १२औँ वार्षिक साधारणसभा काठमाडौंमा सम्पन्न भएको छ । कम्पनीले कालीमाटीस्थित कालीमाटी ब्यांक्वेट हलमा आयोजना गरेको सभामा आर्थिक वर्ष २०८१/८२ को वित्तीय अवस्था, भावी रणनीति तथा संस्थागत सुशासनका विषयमा विस्तृत छलफल गरिएको थियो ।

वार्षिक प्रतिवेदन र वित्तीय विवरण पारित

साधारणसभाले आर्थिक वर्ष २०८१/८२ को वार्षिक प्रतिवेदन, नाफा–नोक्सान हिसाब, नगद प्रवाह विवरण तथा अन्य वित्तीय प्रतिवेदनहरू पारित गरेको कम्पनीले जनाएको छ । साथै, आगामी आर्थिक वर्षका लागि लेखापरीक्षक नियुक्त गर्ने प्रस्ताव पनि सभाबाट अनुमोदन गरिएको छ ।

सेयरधनीलाई बोनस शेयर र नगद लाभांश

सभाले सेयरधनीहरूलाई चुक्ता पूँजीको ७ प्रतिशत बोनस शेयर तथा कर प्रयोजनसहित ०.३६८४२ प्रतिशत नगद लाभांश वितरण गर्ने प्रस्ताव पारित गरेको छ । कम्पनीका अनुसार उक्त लाभांशले लगानीकर्तालाई प्रतिफल प्रदान गर्नुका साथै कम्पनीप्रतिको विश्वासलाई थप मजबुत बनाउने अपेक्षा गरिएको छ ।

लगानी विस्तारका लागि सञ्चालक समितिलाई अधिकार

साधारणसभाबाट भविष्यमा उपयुक्त परियोजना तथा सम्भावित लगानी क्षेत्र पहिचान गरी लगानी विस्तार गर्न सञ्चालक समितिलाई आवश्यक अधिकार प्रदान गर्ने प्रस्ताव समेत स्वीकृत गरिएको छ । कम्पनीले ऊर्जा क्षेत्रमा दीर्घकालीन सम्भावना भएका आयोजनाहरूमा लगानी केन्द्रित गर्ने रणनीति अघि बढाएको जनाएको छ ।

नाम परिवर्तन र नियमावली संशोधन प्रस्ताव पारित

कम्पनीले आफ्नो रणनीतिक तथा सञ्चालन संरचनालाई थप प्रभावकारी बनाउने उद्देश्यले कम्पनीको नाम परिवर्तन तथा प्रबन्धपत्र (MoA) र नियमावली (AoA) संशोधनसम्बन्धी प्रस्ताव पनि सभाबाट पारित गरेको जनाएको छ ।

नवीकरणीय ऊर्जा क्षेत्रमा योगदान
नेपालको जलविद्युत् क्षेत्रमा सक्रिय रूपमा कार्यरत युनाइटेड मोदी हाइड्रोपावरले नवीकरणीय ऊर्जाको विकास, लगानी प्रवर्द्धन तथा ऊर्जा उत्पादन विस्तारमा महत्वपूर्ण भूमिका निर्वाह गर्दै आएको दाबी गरेको छ । कम्पनीले आगामी दिनमा थप प्रभावकारी व्यवस्थापन र दिगो लगानी रणनीतिमार्फत ऊर्जा क्षेत्रमा आफ्नो उपस्थिति अझ सुदृढ बनाउने जनाएको छ ।

प्रतिक्रिया दिनुहोस्