पूर्वाधार वाच, ललितपुर ।

ललितपुर उद्योग वाणिज्य संघ को आयोजनामा स्थानीय सरकारको राजस्व नीति तथा व्यवसायिक वातावरणसम्बन्धी अन्तरक्रिया कार्यक्रम आज ललितपुरमा सम्पन्न भएको छ ।

संघको राजस्व समितिद्वारा आयोजित कार्यक्रम कुमारीपाटीस्थित अग्नी पार्टी प्यालेसमा सम्पन्न भएको हो । कार्यक्रममा ललितपुर महानगरपालिकाकी उपमेयर मञ्जली शाक्य बज्राचार्यको प्रमुख आतिथ्यता रहेको थियो भने उद्योगी, व्यवसायी, संघका पदाधिकारी तथा स्थानीय तहका प्रतिनिधिहरूको उल्लेखनीय सहभागिता रहेको आयोजकले जनाएको छ ।

राजस्व नीति र व्यवसायिक वातावरणबारे छलफल

कार्यक्रममा स्थानीय तहको राजस्व नीति, कर प्रणाली, व्यवसाय सञ्चालनका चुनौती तथा निजी क्षेत्र र स्थानीय सरकारबीचको सहकार्यका विषयमा विस्तृत छलफल गरिएको थियो । सहभागी व्यवसायीहरूले स्थानीय तहबाट लगाइने विभिन्न कर तथा शुल्कलाई व्यवसायमैत्री बनाउनुपर्ने आवश्यकता औंल्याएका थिए ।

उनीहरूले उद्योग तथा व्यापार क्षेत्रलाई प्रोत्साहन गर्ने नीति आवश्यक रहेको उल्लेख गर्दै कर प्रणालीलाई सरल, पारदर्शी र व्यवहारिक बनाउन सुझाव दिएका थिए ।

निजी क्षेत्रसँग सहकार्य गर्न महानगर तयार

कार्यक्रममा बोल्दै उपमेयर मञ्जली शाक्य बज्राचार्यले स्थानीय सरकार निजी क्षेत्रसँग सहकार्य गर्दै व्यवसायमैत्री वातावरण निर्माण गर्न प्रतिबद्ध रहेको बताइन् । उनले उद्योगी–व्यवसायीका सुझावलाई नीति निर्माण तथा कार्यान्वयन प्रक्रियामा समेट्ने प्रतिबद्धता व्यक्त गरिन् ।

उनले स्थानीय आर्थिक गतिविधि सुदृढ बनाउन उद्योग तथा व्यापार क्षेत्रको भूमिका महत्वपूर्ण रहेको उल्लेख गर्दै महानगर र निजी क्षेत्रबीच निरन्तर संवाद आवश्यक रहेको धारणा राखिन् ।

संवाद र सहकार्यलाई प्राथमिकता

ललितपुर उद्योग वाणिज्य संघले निजी क्षेत्रको हकहित संरक्षण, उद्यमशीलता प्रवर्द्धन तथा व्यवसायिक वातावरण सुधारका लागि विभिन्न कार्यक्रम सञ्चालन गर्दै आएको जनाएको छ ।

संघका पदाधिकारीहरूले स्थानीय सरकार र निजी क्षेत्रबीच समन्वय तथा सहकार्यलाई अझ प्रभावकारी बनाउन यस्ता अन्तरक्रिया कार्यक्रमले महत्वपूर्ण भूमिका खेल्ने बताएका छन् ।

कार्यक्रममा सहभागीहरूले राजस्व नीतिलाई व्यवसाय प्रवर्द्धनमुखी बनाउनुपर्ने, लगानीमैत्री वातावरण सिर्जना गर्नुपर्ने तथा सेवा प्रवाहलाई थप प्रभावकारी बनाउनुपर्ने विषयमा जोड दिएका थिए ।

प्रतिक्रिया दिनुहोस्