पूर्वाधार वाच, काठमाडौं।

भोटेकोशी बाढी तथा पहिरोबाट प्रभावित नागरिकको राहत, उद्धार तथा पुनःस्थापनाका लागि नेपाल भ्यालुयर्स एसोसिएसन (एनभीए) ले प्रधानमन्त्री दैवी प्रकोप उद्धार कोषमा १० लाख रुपैयाँ सहयोग गरेको छ ।

एसोसिएसनका अध्यक्ष इन्जिनियर सञ्जयकुमार महतोको नेतृत्वमा गएको टोलीले अर्थमन्त्री स्वर्णिम वाग्लेलाई १० लाख रुपैयाँको सहयोग रकम हस्तान्तरण गरेको हो । भोटेकोशी क्षेत्रमा आएको विनाशकारी बाढी तथा पहिरोबाट प्रभावित नागरिकलाई सरकारी संयन्त्रमार्फत राहत तथा उद्धारमा सहयोग पुगोस् भन्ने उद्देश्यले रकम प्रदान गरिएको हो ।

भोटेकोशीमा आएको बाढीका कारण ठूलो मानवीय तथा भौतिक क्षति भएपछि सरकारले प्रधानमन्त्री दैवी प्रकोप उद्धार कोषमार्फत राहत तथा उद्धारका लागि स्रोत परिचालन गर्दै आएको छ । पछिल्लो समय निजी क्षेत्र, व्यवसायिक संघसंस्था तथा विभिन्न संस्थाहरूले समेत उक्त कोषमा सहयोग गर्ने क्रम बढेको छ ।

नेपाल भ्यालुयर्स एसोसिएसन पेशागत मूल्याङ्कनकर्ताहरूको छाता संस्था हो । संस्थाका अनुसार एनभीए २०६८ सालमा स्थापना भएको हो र देशमा मूल्याङ्कन व्यवसायलाई व्यवस्थित, व्यावसायिक तथा मर्यादित बनाउन काम गर्दै आएको छ । संस्थामा भूमि, भवन, प्लान्ट तथा मेसिनरीलगायत विभिन्न क्षेत्रमा मूल्याङ्कन कार्यमा संलग्न करिब ९ सय संस्थागत सदस्य रहेको एनभीएको वेबसाइटमा उल्लेख छ ।

एनभीए अन्तर्राष्ट्रिय मूल्याङ्कन मापदण्ड परिषद् (IVSC) को सदस्यसमेत रहेको छ । संस्थाले मूल्याङ्कन क्षेत्रसँग सम्बन्धित तालिम, परामर्श, प्रकाशन तथा नीतिगत विषयमा पैरवी गर्दै आएको जनाएको छ ।

इन्जिनियर सञ्जयकुमार महतो सन् २०२४ मा एनभीएको छैटौँ अधिवेशनबाट अध्यक्षमा निर्विरोध निर्वाचित भएका थिए । उनको नेतृत्वमा १६ सदस्यीय कार्यसमिति चयन भएको थियो ।

एनभीएले विपद्का समयमा पेशागत जिम्मेवारीसँगै सामाजिक उत्तरदायित्वलाई समेत प्राथमिकता दिँदै प्रभावित समुदायको राहत तथा पुनःस्थापनामा सहयोग पुर्‍याएको जनाएको छ ।

प्रतिक्रिया दिनुहोस्