पूर्वाधार वाच, विराटनगर  ।

पी.एल.ओ. ब्रान्डअन्तर्गत ल्युब्रिकेन्ट उत्पादन गर्दै आएको पूर्वाञ्चल ल्युब आयल लिमिटेडको २७औँ वार्षिक साधारणसभा सम्पन्न भएको छ । विराटचोकस्थित नेपालरिका होटलको मकालु हलमा सम्पन्न सभाले आर्थिक वर्ष २०८२/८३ को वार्षिक तथा वित्तीय प्रतिवेदनसहित विभिन्न प्रस्ताव पारित गरेको हो ।

साधारणसभाले कम्पनीको चुक्ता पुँजीमा करसहित ८.४२ प्रतिशत नगद लाभांश वितरण गर्ने प्रस्ताव अनुमोदन गरेको छ । साथै, आर्थिक वर्ष २०८३/८४ का लागि लेखापरीक्षक नियुक्ति तथा पारिश्रमिक निर्धारण, प्रस्तावित बजेट, सञ्चालकहरूको पारिश्रमिक तथा नयाँ सञ्चालक समिति चयनसम्बन्धी प्रस्तावसमेत पारित भएका छन् ।

बुक बिल्डिङमार्फत आईपीओ ल्याउने तयारी

साधारणसभासँगै कम्पनीले प्राथमिक सार्वजनिक निष्कासन (आईपीओ)को तयारीलाई समेत अघि बढाएको छ । कम्पनीले बुक बिल्डिङ विधिमार्फत आईपीओ निष्कासनका लागि योग्य संस्थागत लगानीकर्ताका लागि ६ लाख कित्ता शेयर छुट्याएको छ ।

नेपाल स्टक एक्सचेञ्जसँग कम्पनीले बुक बिल्डिङ प्रक्रियाअन्तर्गत योग्य संस्थागत लगानीकर्ताका लागि छुट्याइएको शेयरसम्बन्धी बोलपत्र प्रक्रिया सञ्चालन गर्न सम्झौता गरिसकेको विवरणसमेत सार्वजनिक भएको छ । पूर्वाञ्चल ल्युब आयल बुक बिल्डिङमार्फत आईपीओ प्रक्रिया अघि बढाउने कम्पनीमध्ये एक हो ।

आईपीओबाट पूँजी विस्तार गर्ने लक्ष्य

कम्पनीले आईपीओबाट प्राप्त हुने पूँजीलाई व्यवसाय तथा उत्पादन विस्तारमा उपयोग गर्ने योजना अघि सारेको छ । सार्वजनिक शेयर निष्कासनमार्फत पूँजी आधार थप मजबुत बनाउँदै व्यावसायिक गतिविधि विस्तार गर्ने कम्पनीको लक्ष्य रहेको छ ।

हाल उपलब्ध विवरणअनुसार सर्वसाधारणका लागि आईपीओ निष्कासनको मिति, शेयरको मूल्य तथा आवेदन खुल्ने प्रक्रियाबारे भने कम्पनीले औपचारिक जानकारी सार्वजनिक गरिसकेको छैन ।

पूर्वाञ्चल ल्युब आयलको २७औँ साधारणसभा असोज १६ गते विराटचोकमा आयोजना गरिएको थियो । साधारणसभाको मुख्य कार्यसूचीमा आर्थिक वर्ष २०८२/८३ को वित्तीय विवरण, नगद लाभांश, आगामी आर्थिक वर्षको बजेट, लेखापरीक्षक नियुक्ति तथा नयाँ सञ्चालक समिति चयनलगायत विषय समावेश थिए ।

प्रतिक्रिया दिनुहोस्