पूर्वाधार वाच, काठमाडौं ।

सूर्यकुण्ड हाइड्रो इलेक्ट्रिक लिमिटेडको २०औँ वार्षिक साधारणसभा सम्पन्न भएको छ । शुक्रबार काठमाडौंमा कम्पनीका अध्यक्ष सञ्जीव न्यौपानेको अध्यक्षतामा सम्पन्न सभाले आर्थिक वर्ष २०८२/८३ को वार्षिक प्रतिवेदन तथा वित्तीय विवरणहरू पारित गर्नुका साथै नयाँ सञ्चालक समिति चयन गरेको छ ।

सभाले अध्यक्ष न्यौपानेद्वारा प्रस्तुत वार्षिक प्रतिवेदन र लेखापरीक्षकको प्रतिवेदनमाथि छलफल गरी सर्वसम्मतिले स्वीकृत गरेको हो । त्यसैगरी, आर्थिक वर्ष २०८२/८३ को वासलात, नाफा–नोक्सान हिसाब तथा नगद प्रवाह विवरणलगायत वित्तीय विवरणहरू पनि पारित गरेको कम्पनीले जनाएको छ ।

पाँच सदस्यीय नयाँ सञ्चालक समिति चयन

साधारणसभाले कम्पनीको नयाँ सञ्चालक समितिमा पाँच जना सदस्य चयन गरेको छ । जसअनुसार संस्थापक सेयरधनी समूहबाट सञ्जीव न्यौपाने, सिर्जना खड्का र द्वारिकाप्रसाद न्यौपाने निर्विरोध निर्वाचित भएका छन् ।

त्यस्तै, सर्वसाधारण सेयरधनी समूहबाट सुशान्त तिमल्सिना सञ्चालकमा चयन भएका छन् भने लोकराज जोशी स्वतन्त्र सञ्चालकका रूपमा चयन भएका छन् ।

नयाँ सञ्चालक समितिले कम्पनीको संस्थागत सुशासनलाई थप सुदृढ बनाउँदै जलविद्युत् उत्पादन तथा व्यवस्थापनलाई प्रभावकारी बनाउने अपेक्षा गरिएको छ ।

११ मेगावाटको माथिल्लो तादी खोला आयोजना सञ्चालनमा

नवीकरणीय ऊर्जा क्षेत्रमा सक्रिय सूर्यकुण्ड हाइड्रो इलेक्ट्रिक लिमिटेडले नुवाकोट जिल्लाको दुप्चेश्वर गाउँपालिकामा रहेको ११ मेगावाट क्षमताको माथिल्लो तादी खोला जलविद्युत् आयोजना निर्माण सम्पन्न गरी व्यावसायिक विद्युत् उत्पादन गरिरहेको छ ।

रन-अफ-रिभर प्रकृतिको उक्त आयोजनाले २०८२ साल साउन १२ गतेदेखि व्यावसायिक उत्पादन सुरु गरेको हो । आयोजनाबाट उत्पादित विद्युत् ३३ केभी क्षमताको ८ किलोमिटर लामो डबल सर्किट प्रसारण लाइनमार्फत नेपाल विद्युत् प्राधिकरणको समुन्द्रटार सबस्टेसनमा जोडेर राष्ट्रिय प्रसारण प्रणालीमा प्रवाह गरिँदै आएको छ ।

कम्पनीका अनुसार आयोजनाबाट वार्षिक ६१.३१९ गिगावाट घण्टा विद्युत् उत्पादन हुने अनुमान गरिएको छ । यसमध्ये वर्षायाममा ५०.८९३ गिगावाट घण्टा र सुक्खायाममा १०.४२५ गिगावाट घण्टा विद्युत् उत्पादन हुने प्रक्षेपण छ ।

अपि पावरको ४७.७३ प्रतिशत सेयर स्वामित्व

सूर्यकुण्ड हाइड्रो इलेक्ट्रिक लिमिटेडको प्रमुख प्रवर्द्धक तथा लगानीकर्ता अपि पावर कम्पनी लिमिटेड रहेको छ । अपि पावरको कम्पनीमा ४७.७३ प्रतिशत सेयर स्वामित्व रहेको छ । अपि पावरले जलविद्युत्का साथै सौर्य ऊर्जा क्षेत्रमा समेत लगानी तथा आयोजना सञ्चालन गर्दै आएको छ ।

विसं २०६४ असार १ गते प्राइभेट लिमिटेडका रूपमा स्थापना भएको सूर्यकुण्ड हाइड्रो इलेक्ट्रिक लिमिटेडलाई व्यापक जनसहभागिता सुनिश्चित गर्ने उद्देश्यले २०८० असार २१ गते पब्लिक लिमिटेड कम्पनीमा रूपान्तरण गरिएको थियो । कम्पनीमा हाल ६०६ जना संस्थापक सेयरधनी रहेका छन् ।

आईपीओ निष्कासनपछि नेप्सेमा सूचीकृत

कम्पनीले सर्वसाधारणका लागि १३ लाख ३९ हजार ३५० कित्ता साधारण सेयर निष्कासन गर्न २०८२ साल मंसिर २५ गते नेपाल धितोपत्र बोर्डबाट स्वीकृति प्राप्त गरेको थियो । त्यसपछि २०८२ चैत १२ गते नेपाल स्टक एक्सचेन्ज (नेप्से) मा सूचीकृत भएको कम्पनीको सेयर ‘SKHEL’ संकेतमा दोस्रो बजारमा कारोबार हुँदै आएको छ ।

साधारणसभाबाट वार्षिक प्रतिवेदन तथा वित्तीय विवरण पारित हुनु र नयाँ सञ्चालक समिति चयन हुनुले कम्पनीको आगामी व्यावसायिक योजनालाई अघि बढाउन संस्थागत आधार तयार गरेको छ ।

कम्पनीले जलविद्युत् उत्पादन तथा व्यापारलाई थप प्रभावकारी बनाउँदै वित्तीय अवस्था सुदृढ गर्ने र सेयरधनीहरूको हित संरक्षणलाई प्राथमिकतामा राख्ने अपेक्षा गरिएको छ ।

प्रतिक्रिया दिनुहोस्