पूर्वाधार वाच, काठमाडौं।

कौटिल्य बचत तथा ऋण सहकारी संस्था लिमिटेड, चाबहिलको २६औँ वार्षिक साधारणसभा सम्पन्न भएको छ । साधारणसभामा संस्थाको आर्थिक वर्ष २०८२/८३ को वार्षिक प्रगति प्रतिवेदन, आर्थिक प्रतिवेदन तथा आगामी वर्षको नीति तथा कार्यक्रममाथि छलफल गरिएको थियो ।

साधारणसभामा सञ्चालक समितिका तर्फबाट कार्यवाहक अध्यक्ष दीपक पौडेलले आर्थिक वर्ष २०८२/८३ को वार्षिक प्रतिवेदन प्रस्तुत गरेका थिए । संस्थाको आर्थिक अवस्था, विगत वर्षका गतिविधि तथा आगामी योजनासहितको प्रतिवेदनमाथि छलफल गर्दै सभा अगाडि बढाइएको थियो ।

कोषाध्यक्ष शशिधर अर्यालले आर्थिक प्रतिवेदन प्रस्तुत गरेका थिए । सभामा आर्थिक वर्षको लेखापरीक्षण प्रतिवेदन, वासलात, आम्दानी–खर्च तथा अन्य वित्तीय विवरणमाथि समेत छलफल गरिएको थियो ।

सेयर सदस्यको बचत र हितलाई प्राथमिकता

सहकारीले आफ्नो स्थापना कालदेखि नै सदस्यहरूको आर्थिक तथा वित्तीय आवश्यकतालाई प्राथमिकतामा राख्दै बचत तथा ऋण सेवा सञ्चालन गर्दै आएको जनाएको छ । संस्थाले सुरक्षित बचत परिचालन, गुणस्तरीय ऋण सेवा तथा सदस्यकेन्द्रित सुविधामार्फत आफ्नो कार्यसम्पादनलाई निरन्तर सुधार गर्दै आएको वार्षिक प्रतिवेदनमा उल्लेख गरिएको छ ।

संस्थाको स्थापना विसं २०५७ साल जेठ १७ गते भएको हो । प्रारम्भिक चरणमा २८ जना सदस्यबाट सुरु भएको सहकारीमा हाल सदस्य संख्या उल्लेख्य रूपमा विस्तार भएको छ । संस्थामा महिला सदस्यको सहभागिता पनि उल्लेख्य रहेको जनाइएको छ ।

आर्थिक प्रतिवेदन तथा आगामी नीति कार्यक्रम पारित

साधारणसभाले आर्थिक वर्ष २०८२/८३ को लेखापरीक्षण प्रतिवेदनमाथि छलफल गरी आवश्यक निर्णय गरेको छ । साथै चालु आर्थिक वर्षका लागि अनुमानित आय–व्यय, नीति तथा कार्यक्रम र वार्षिक बजेटसम्बन्धी प्रस्तावमाथि पनि छलफल गरिएको थियो ।

सभाले आगामी आर्थिक वर्षका लागि लेखापरीक्षक नियुक्त गर्ने तथा निजको पारिश्रमिक निर्धारण गर्ने विषयमा समेत निर्णय गरेको जनाएको छ ।

त्यस्तै, सेयर लाभांश कोषमा जम्मा रहेको रकमबाट सदस्यहरूलाई लाभांश वितरण गर्ने, संरक्षित पुँजी फिर्ता कोषमा रहेको रकम सदस्यहरूको बचत, ऋण कारोबार वा सेयर पुँजीका आधारमा वितरण गर्नेलगायत प्रस्तावहरू पनि सभाको कार्यसूचीमा रहेका थिए ।

नयाँ सञ्चालक समिति चयनको प्रक्रिया

साधारणसभामा संस्थाको सञ्चालक समिति तथा लेखा सुपरिवेक्षण समितिको निर्वाचनसम्बन्धी प्रक्रिया पनि अघि बढाइएको थियो । संस्थाको विधानअनुसार नयाँ कार्यसमिति चयन तथा जिम्मेवारी हस्तान्तरणसम्बन्धी कार्यक्रम साधारणसभाको महत्वपूर्ण कार्यसूचीका रूपमा रहेको थियो ।

सभाको समापनका क्रममा सेयर सदस्य, सञ्चालक समिति, सल्लाहकार, कर्मचारी तथा संस्थाको विकासमा योगदान पुर्‍याउने सम्पूर्णप्रति धन्यवाद व्यक्त गरिएको थियो ।

२५ वर्षभन्दा लामो सहकारी यात्रामा सदस्यकेन्द्रित सेवा, सुरक्षित बचत परिचालन तथा वित्तीय पहुँच विस्तारलाई प्राथमिकतामा राख्दै आएको कोटिल्य बचत तथा ऋण सहकारी संस्थाले आगामी दिनमा पनि आफ्नो सेवालाई थप प्रभावकारी बनाउँदै लैजाने प्रतिबद्धता जनाएको छ ।

प्रतिक्रिया दिनुहोस्