पूर्वाधार वाच, काठमाडौं।

चेतनशील महिला बचत तथा ऋण सहकारी संस्था लिमिटेडको १५औँ वार्षिक साधारण सभा सम्पन्न भएको छ । साधारण सभामा आर्थिक वर्ष २०८२/०८३ को वार्षिक प्रगति, वित्तीय अवस्था तथा आगामी वर्षको कार्ययोजनामाथि छलफल गरी विभिन्न प्रस्ताव पारित गरिएको छ ।

साधारण सभामा सञ्चालक समितिका तर्फबाट अध्यक्ष विदिता अधिकारीले प्रस्तुत गरेको आर्थिक वर्ष २०८२/०८३ को वार्षिक प्रतिवेदनमाथि छलफल गरी पारित गरिएको संस्थाले जनाएको छ । त्यस्तै, लेखा परीक्षण प्रतिवेदनसहितको वित्तीय विवरण तथा लेखा सुपरिवेक्षण समितिको प्रतिवेदनमाथि समेत छलफल भएको थियो ।

सभाले आर्थिक वर्ष २०८३/०८४ का लागि लेखापरीक्षक नियुक्ति तथा पारिश्रमिक निर्धारण गर्ने, सञ्चालक समितिले तयार पारेका विभिन्न नीति तथा कार्यविधिलाई अनुमोदन गर्ने तथा संस्थाको पुरानो विनियम संशोधन र नयाँ विनियम निर्माणसम्बन्धी विषयमा समेत आवश्यक निर्णय गरेको छ ।

यस्तै, सञ्चालक समिति, लेखा समिति तथा ऋण उपसमितिका पदाधिकारीको भत्ता तथा प्रमुख कार्यकारी अधिकृतको तलब–भत्तासम्बन्धी विषयमा पनि छलफल गरिएको थियो । साधारण सभाको निर्णय पुस्तिकामा हस्ताक्षर गर्न शेयर सदस्यहरूमध्येबाट प्रतिनिधि छनोट गर्ने विषय पनि सभाको कार्यसूचीमा समावेश गरिएको थियो ।

अध्यक्ष अधिकारीले प्रस्तुत गरेको प्रतिवेदनमा संस्थाले चुनौतीपूर्ण आर्थिक परिस्थितिका बीच पनि सहकारीको मूल सिद्धान्त, पारदर्शिता, सुशासन, नैतिकता र जवाफदेहितालाई प्राथमिकतामा राखेर सदस्यकेन्द्रित सेवा प्रवाह गर्दै आएको उल्लेख गरिएको छ । संस्थामा महिला सदस्यको सहभागिता उल्लेख्य रहेको जनाइएको छ ।

संस्थाले बचत तथा ऋण कारोबारसँगै सदस्यहरूको आर्थिक तथा वित्तीय आवश्यकतालाई सम्बोधन गर्दै आएको जनाएको छ । अध्यक्ष अधिकारीले हालको आर्थिक तथा व्यावसायिक चुनौतीका कारण सहकारी क्षेत्रसमेत प्रभावित भए पनि संस्थालाई सुरक्षित, सक्षम, सुशासित र पारदर्शी बनाउँदै अघि बढाइने प्रतिबद्धता व्यक्त गरेकी छन् ।

प्रतिवेदनमा संस्थाले सामाजिक उत्तरदायित्वअन्तर्गत विभिन्न सहयोगमूलक गतिविधिसमेत सञ्चालन गर्दै आएको उल्लेख छ । बाढीपीडितको सहयोगका लागि समेत संस्थाले आर्थिक सहयोग गरेको जनाएको छ ।

अध्यक्ष अधिकारीले संस्थाको विकासमा सहयोग पुर्‍याउने शेयर सदस्य, सञ्चालक समिति, लेखा समिति, विभिन्न उपसमिति, कर्मचारी, सल्लाहकार तथा शुभेच्छुकप्रति आभार व्यक्त गर्दै आगामी दिनमा सबैको साथ र सहयोगबाट संस्थालाई थप सुदृढ बनाउने प्रतिबद्धता जनाएकी छन् ।

साधारण सभाले संस्थाको आर्थिक प्रतिवेदन, नीति तथा आगामी कार्यदिशामाथि छलफल गर्दै सदस्यको हित, संस्थागत सुशासन र दिगो विकासलाई प्राथमिकतामा राखेर अघि बढ्ने निष्कर्ष निकालेको छ ।

चेतनशील महिला बचत तथा ऋण सहकारी संस्था लिमिटेडको १५औँ वार्षिक साधारण सभाबाट पार्वती पौडेलको अध्यक्षतामा नयाँ सञ्चालक समिति चयन भएको छ । समितिको उपाध्यक्षमा भावना गौतम ज्ञवाली, सचिवमा बिन्दु कुमारी शर्मा बसेल, कोषाध्यक्षमा विष्णु देवी शर्मा बराल तथा सदस्यहरूमा यशोदा ज्ञवाली, सिर्जना कँडेल र निर्मला पौडेल चयन भएका छन् । त्यसैगरी, विजया तिमिल्सिनाको संयोजकत्वमा राधिका पोखरेल र इन्दिरा ज्ञवाली सदस्य रहेको लेखा समिति पनि चयन गरिएको छ । नवनिर्वाचित समितिले संस्थागत सुशासन, वित्तीय अनुशासन, सदस्य हित तथा सहकारीको दिगो विकासलाई प्राथमिकतामा राख्दै आगामी कार्य अघि बढाउने अपेक्षा गरिएको छ ।

प्रतिक्रिया दिनुहोस्