पूर्वाधार वाच, काठमाडौं।

नेपाल शिक्षक संघको २५औँ संघीय प्रतिनिधिसभा काठमाडौंमा सुरु भएको छ । नेपाल शिक्षक महासंघका अध्यक्ष देवेन्द्रप्रसाद उपाध्यायको प्रमुख आतिथ्य तथा संघका अध्यक्ष सोमनाथ गिरीको अध्यक्षतामा शनिबार आयोजित उद्घाटन सत्रमार्फत सभा औपचारिक रूपमा प्रारम्भ भएको हो ।

दुईदिने सभामा देशभरबाट प्रतिनिधिको सहभागिता

वैशाख ५ र ६ गते दुई दिनसम्म सञ्चालन हुने प्रतिनिधिसभामा देशका ७७ वटै जिल्लाबाट प्रतिनिधिहरूको सहभागिता रहेको छ । नेपाली कांग्रेसको शुभेच्छुक संस्थाका रूपमा रहेको नेपाल शिक्षक संघको यो प्रतिनिधिसभालाई शिक्षक आन्दोलन र शैक्षिक नीतिका दृष्टिले महत्वपूर्ण मानिएको छ ।

शिक्षक हकहित र पेशागत स्थायित्वमा केन्द्रित छलफल

उद्घाटन कार्यक्रममा शिक्षकहरूको पेशागत हकहित, सेवा सुरक्षा, अधिकार तथा पेशागत स्थायित्वका विषयमा बृहत् छलफल गरिएको थियो । सहभागीहरूले विद्यालय शिक्षाको गुणस्तर अभिवृद्धि, शिक्षकको मनोबल वृद्धि तथा शैक्षिक सुधारका लागि स्पष्ट नीति आवश्यक रहेको धारणा राखेका थिए ।

शिक्षा नीति परिवर्तनका विषयमा गहन बहस हुने

संघका अध्यक्ष सोमनाथ गिरीले प्रतिनिधिसभामा शिक्षा र शिक्षकसँग सम्बन्धित समसामयिक मुद्दा, विगतमा भएका आन्दोलनका चरण, चुनौती तथा समाधानका उपायबारे विस्तृत छलफल हुने जानकारी दिए । उनले शिक्षकमैत्री शिक्षा नीति निर्माणका लागि संघले आफ्ना धारणा सशक्त रूपमा प्रस्तुत गर्ने बताए ।

सरकारी नीतिप्रति चासो

शिक्षकहरूलाई दलगत आस्थाका आधारमा संगठन निर्माण वा राजनीतिक विचारका आधारमा गतिविधि गर्न रोक्ने सम्भावित सरकारी नीतिप्रति शिक्षक वृत्तमा चासो बढेको छ । यस विषयमा पनि प्रतिनिधिसभामा धारणा निर्माण हुने अपेक्षा गरिएको छ ।

निष्कर्षसहित सकिने तयारी

नेपाल शिक्षक संघले प्रतिनिधिसभाबाट शिक्षक समुदायका साझा मुद्दा समेटिएको निष्कर्ष, भावी कार्यदिशा तथा शैक्षिक सुधारसम्बन्धी प्रस्ताव पारित गर्ने तयारी गरेको जनाएको छ ।

प्रतिक्रिया दिनुहोस्