पूर्वाधार वाच, काठमाडौं।

लमजुङमा ८.६३ मेगावाट क्षमताको चेपे खोला साना जलविद्युत् आयोजना सञ्चालन गरिरहेको आशुतोष इनर्जी लिमिटेडको नवौँ वार्षिक साधारणसभा सम्पन्न भएको छ । सभाले शेयरधनीलाई १८.९४७ प्रतिशत नगद लाभांश वितरण गर्ने प्रस्ताव पारित गरेको छ ।

कम्पनीका अनुसार हाल कायम ४८ करोड रुपैयाँ चुक्ता पुँजीको १८.९४७ प्रतिशतका दरले ९ करोड ९ लाख ४७ हजार ४० रुपैयाँ नगद लाभांश वितरण गरिनेछ ।

प्रसारण लाइनको ढिलाइले चार वर्षमा २८ करोड घाटा

कम्पनीको वार्षिक प्रतिवेदनअनुसार प्रसारण लाइन निर्माणमा भएको ढिलाइका कारण पछिल्ला चार आर्थिक वर्षमा आशुतोष इनर्जीले करिब २८ करोड रुपैयाँ घाटा व्यहोर्नुपरेको छ ।

कम्पनीका अनुसार आर्थिक वर्ष २०७९/८० मा ५ करोड ९२ लाख रुपैयाँ, २०८०/८१ मा ८ करोड ६० लाख रुपैयाँ, २०८१/८२ मा ६ करोड २ लाख रुपैयाँ र २०८२/८३ मा ५ करोड ४७ लाख रुपैयाँ घाटा भएको थियो ।

हाल २२० केभी प्रसारण लाइनको निर्माण सम्पन्न भइसकेको कम्पनीले जनाएको छ । नेपाल विद्युत् प्राधिकरणसँग गरिएको वैकल्पिक व्यवस्थालाई समेत खारेज गर्ने प्रक्रिया अन्तिम चरणमा पुगेको बताउँदै कम्पनीले अब आयोजनाबाट पूर्ण क्षमतामा विद्युत् उत्पादन गर्न सकिने अपेक्षा गरेको छ ।

१२ लाख कित्ता आईपीओ निष्कासनको तयारी

आशुतोष इनर्जीले आयोजना प्रभावित स्थानीय तथा सर्वसाधारणका लागि १२ करोड रुपैयाँ बराबरको १२ लाख कित्ता साधारण शेयर निष्कासन गर्ने तयारी गरिरहेको छ ।

कम्पनीका अनुसार आईपीओ निष्कासनका लागि दुई वर्षअघि नै नेपाल धितोपत्र बोर्डमा आवेदन दिइसकिएको छ । बोर्डबाट स्वीकृति प्राप्त भएपछि शेयर निष्कासन प्रक्रिया अघि बढाइनेछ ।

२ मेगावाटको चेपे खोला क्यास्केड बनाउने योजना

कम्पनीले आगामी योजनाअन्तर्गत २ मेगावाट क्षमताको चेपे खोला क्यास्केड जलविद्युत् आयोजना निर्माण गर्ने तयारीसमेत गरेको छ । निर्धारित समयभित्र आयोजना निर्माण सम्पन्न गर्ने प्रतिबद्धता कम्पनीले जनाएको छ ।

२०७९ असोजदेखि व्यावसायिक उत्पादन

आशुतोष इनर्जीले लमजुङस्थित चेपे खोलाबाट २०७९ असोज १५ गतेदेखि व्यावसायिक रूपमा विद्युत् उत्पादन गर्दै आएको छ । ८.६३ मेगावाट क्षमताको उक्त आयोजनाबाट उत्पादित विद्युत् राष्ट्रिय प्रसारण प्रणालीमा आपूर्ति हुँदै आएको कम्पनीले जनाएको छ ।

भोटेकोसी बाढीपीडितलाई १० लाख सहयोग

सामाजिक उत्तरदायित्वअन्तर्गत कम्पनीले हालै भोटेकोसी बाढीबाट प्रभावित परिवार तथा क्षेत्रका लागि प्रधानमन्त्री दैवी प्रकोप उद्धार कोषमा १० लाख रुपैयाँ आर्थिक सहयोग उपलब्ध गराएको जनाएको छ ।

कम्पनीले प्रसारण लाइनको समस्या समाधान भएसँगै आयोजनाको उत्पादन क्षमता पूर्ण रूपमा उपयोग गर्ने, वित्तीय अवस्था सुधार गर्ने तथा नयाँ आयोजनामा लगानी विस्तार गर्ने रणनीति अघि सारेको जनाएको छ ।

प्रतिक्रिया दिनुहोस्