पूर्वाधार वाच, काठमाडौं।

नीलोआकाश बचत तथा ऋण सहकारी संस्था लिमिटेड, काठमाडौं–३२ गैरीगाउँको १९औँ वार्षिक साधारणसभा सम्पन्न भएको छ । संस्थाले शनिबार तिनकुनेस्थित ताज ब्याङ्केटमा साधारणसभा आयोजना गरेको हो ।

साधारणसभामा सञ्चालक समितिका अध्यक्ष तथा कोषाध्यक्षको प्रतिवेदन, लेखा सुपरिवेक्षण समितिको प्रतिवेदन र आर्थिक वर्ष २०८२/८३ को लेखापरीक्षकको प्रतिवेदनमाथि छलफल गरिएको थियो । सभामा संस्थाको आर्थिक अवस्था, हालसम्मको प्रगति तथा आगामी कार्ययोजनाबारे समेत विस्तृत छलफल भएको थियो ।

आर्थिक अवस्था सुधारोन्मुख

संस्थाको १९औँ वार्षिक प्रतिवेदनमा पछिल्लो समय आर्थिक अवस्था क्रमशः सामान्य लयमा फर्किंदै गएको उल्लेख गरिएको छ । प्रतिवेदनमा २०८३ भदौ १० गतेदेखि आएको बाढीपहिरोका कारण सदस्यहरूको जीवनस्तरमा परेको नकारात्मक प्रभावको समेत मूल्यांकन गरिएको छ ।

आर्थिक मन्दीको चुनौतीका बीच सदस्यहरूको बचत सुरक्षित राख्ने तथा नियामक निकायका निर्देशन पालना गर्ने प्रयास गरिएको संस्थाले जनाएको छ । यस क्रममा सञ्चालक समिति, लेखा सुपरिवेक्षण समिति, सल्लाहकार, विभिन्न उपसमिति, कर्मचारी र शेयर सदस्यहरूको सामूहिक प्रयास महत्वपूर्ण रहेको प्रतिवेदनमा उल्लेख छ ।

सदस्यलाई सहुलियत कर्जा र वित्तीय सुविधा

संस्थाले सदस्यलाई सहजता प्रदान गर्ने उद्देश्यले लगानीसम्बन्धी नीतिमा समयानुकूल निर्णय गर्दै आएको जनाएको छ । सहुलियत कर्जा, कर्जा नवीकरण, आवश्यकताअनुसार स्थिर कर्जा सुविधा तथा शेयर र बचतको अनुपातमा सुविधा कर्जालगायतका कार्यक्रम सञ्चालन गरिएको प्रतिवेदनमा उल्लेख छ ।

यस्ता सुविधाले सदस्यको अल्पकालीन, मध्यकालीन तथा दीर्घकालीन आर्थिक व्यवस्थापनमा सहयोग पुगेको संस्थाको दाबी छ । संकटका समयमा गरिएका अल्पकालीन निर्णयको पुनरावलोकन गर्दै लगानी, ऋणको किस्ता, ब्याज तथा बचतलाई थप नियमित र व्यवस्थित बनाउनेतर्फ संस्था अघि बढिरहेको जनाइएको छ ।

आगामी वर्षका लागि नयाँ कार्ययोजना

साधारणसभामा आर्थिक वर्ष २०८२/८३ मा संस्थाले हासिल गरेको प्रगतिको समीक्षा गरिएको थियो । सोही आधारमा आर्थिक वर्ष २०८३/८४ का लागि कार्ययोजना तय गरिएको जनाइएको छ ।

आगामी वर्षका कार्यक्रमलाई प्रभावकारी रूपमा कार्यान्वयन गरी संस्थालाई थप सक्षम बनाउने विषयमा सभामा छलफल भएको थियो । संस्थाको दीर्घकालीन स्थायित्वका लागि शेयर सदस्यहरूको निरन्तर साथ र सहयोग आवश्यक रहेकोमा पनि जोड दिइएको थियो ।

संस्थाले हालसम्मको यात्रा शेयर सदस्यहरूको विश्वास र सहकार्यबाट सम्भव भएको भन्दै सदस्यहरूप्रति आभार व्यक्त गरेको छ ।

संस्थागत सुशासन र पारदर्शितामा जोड

वार्षिक प्रतिवेदनमा संस्थाको स्थापनाकालदेखिको संस्थागत विकास, सदस्य संख्या वृद्धि तथा पुँजी संकलनसम्बन्धी विवरण समावेश गरिएको छ । कर्मचारी प्रशासनमार्फत छिटो, सहज र पारदर्शी सेवा प्रदान गर्दै आएको संस्थाले जनाएको छ ।

सहकारी ऐन, नियम, नियमावली, निर्देशिका तथा संस्थाको विनियमअनुसार संस्थागत सुशासन कायम गर्न लागू गरिएका आन्तरिक कार्यविधि र तिनका आधारमा भएका गतिविधिबारे पनि सभामा जानकारी गराइएको थियो ।

यसअघि साधारणसभाबाट प्रस्तावित नीति तथा कार्यक्रम कार्यान्वयनका लागि विभिन्न बैठकमार्फत वार्षिक कार्यक्रमको निर्णय, मूल्यांकन, समीक्षा तथा पुनरावलोकन गरिएको प्रतिवेदनमा उल्लेख छ ।

लाभांशदेखि विनियम संशोधनसम्मका प्रस्ताव

साधारणसभामा आर्थिक वर्ष २०८२/८३ को लाभांश वितरण, आर्थिक वर्ष २०८३/८४ का लागि लेखापरीक्षक नियुक्ति तथा पारिश्रमिक निर्धारणलगायतका विषयमा छलफल गरिएको थियो ।

त्यस्तै, संस्थाको विनियम संशोधन तथा आन्तरिक कार्यविधि पारित गर्ने, संस्थाको दायित्व स्वीकार तथा भुक्तानी गर्न अख्तियारी दिने, सदस्यको दायित्व मिनाहा तथा ब्याजदर परिवर्तन, लिलाम तथा गैरबैंकिङ सम्पत्ति प्राप्तिसम्बन्धी प्रस्तावमाथि पनि छलफल भएको थियो ।

सभामा पारिश्रमिक तथा बैठक भत्ता निर्धारण गर्ने र साधारणसभाको निर्णय पुस्तिकामा हस्ताक्षर गर्न शेयर सदस्यका तर्फबाट १० जना प्रतिनिधि चयन गर्ने विषयसमेत कार्यसूचीमा समावेश थियो ।

ज्येष्ठ सदस्य र उत्कृष्ट विद्यार्थी सम्मानित

साधारणसभाको अवसरमा संस्थाले ज्येष्ठ सदस्य सम्मान तथा शैक्षिक सम्मान कार्यक्रमसमेत आयोजना गरेको थियो ।

एसईई, कक्षा १२, स्नातक, स्नातकोत्तर तथा विद्यावारिधि तहमा उत्कृष्ट अंक हासिल गर्ने विद्यार्थीलाई ‘नीलोआकाश उत्कृष्ट शैक्षिक सम्मान–२०८२’ प्रदान गरिएको थियो । त्यस्तै, विभिन्न तह उत्तीर्ण गरेका विद्यार्थीलाई समेत सम्मान गरिएको थियो ।

संस्थाले आगामी दिनमा सदस्यको आर्थिक हित, संस्थागत सुशासन, पारदर्शिता तथा दीर्घकालीन वित्तीय व्यवस्थापनलाई प्राथमिकतामा राख्दै वार्षिक कार्यक्रमहरू प्रभावकारी रूपमा कार्यान्वयन गर्ने प्रतिबद्धता जनाएको छ ।

प्रतिक्रिया दिनुहोस्